"我個樣好似好凶咁, 其實我好膽小............."
(借圖)
膽小嘅唔係隻洛威拿, 係我囉....
我真係好耐, 好耐, 好耐都未試過响條街度發咗癲咁尖叫喇~~
我想同所有狗主講, 尤其是養洛威拿, 牛頭梗, 高加索, 狼狗呢D凶悍狗嘅主人...
放狗時即使唔帶口罩, 都攬番條狗帶吧....
大少每晚收工都會泊架車响離家約10分鐘路程嘅屋苑裡, 再步行回家....好多時候, 佢都會特登先兜嚟屋企, 車埋我再一齊去泊車, 等我晚上都有機會外出走動...
泊好車後, 我地會經過一個小公園, 再行一條行人天橋, 先返到屋企. 好多時响晚上12點左右, 就會有好多人响呢個小公園入面放狗....而其實, 呢個屋苑嘅所有範圍都係不得携犬入內的...
尋 晚我地如常泊好車後途經小公園, 已經見到幾隻不知名大狗响度自由走動; 對於呢D大狗, 我採取嘅政策係"你睇我唔到...你睇我唔到..."咁就行咗去, 儘量唔同佢地有眼神嘅接觸, 亦都儘量抑壓自己嘅恐懼, 唔會話特登行快D或者行慢D咁....攪咁多野, 都係唔想隻狗恰我姐....
事實上, 我家曾養過兩隻狗: 一隻唐狗同一隻約瑟爹利; 所以我只係驚樣子凶猛嘅大狗吧! 安全過晒D大狗, 上咗天橋後, 我仲懶得戚咁同大少講, D狗都好得意呀!
話口未完, 大少同我講, 遠處有隻黑色洛威拿正迎面而來呢!!
再望多兩望, 大少又話: 睇嚟呢隻洛威拿唔係惹少.....
我趕緊捉實大少隻手, 為自己壯壯膽; 又將個手袋拋俾大少, 以防隻狗以為我想立架餐郁佢....(唉~ 大少, 對唔住, 你不入地獄, 誰入地獄呢?!
)好 可惜, 隻狗見到我, 實在太快, 太快咁跑埋嚟, 佢個主人係完全喝唔住隻狗嫁....佢行到我兩個身位左右, 就發狂咁吠, 一路張牙舞爪....我真係忍唔住尖叫, 一面半扯半拉大少埋條攔杆度...事實上我已經嚇到合埋眼, 只係聽到個主人係咁喝隻狗....之後我聽到個狗主係咁講"Sorry", 我先夠膽睜開眼, 大概隻狗見到我受驚個樣, 攞晒彩吧! 牠搖住尾巴離去...而我之前响下面公園仔見到嘅狗群, 因為聽到尖叫/狗吠聲而跑晒上嚟....大少就係咁鬧個狗主, 個狗主其實都嚇到傻咗, 不停咁講: "Sorry..."
呢隻衰狗....唔吠神高神大嘅大少, 走嚟吠我....真係欺善怕惡呀!!!
沒有留言:
張貼留言