數日簡單自煮午餐 * 甩繩馬騮

5月4日  星期五  晴天

呢一排雖然懶咗成鬼日出街食晏,
不過間中都有煮吓D簡單嘅午餐...
某一日食冬菇牛肉雜米粥,
配菜求其得可以, 剪開包木耳榨菜絲俾大少送粥就算!!


成日都要諗計仔氹鍾意多肉少菜嘅大少食多D菜.
當我發現佢果排成鬼日食肉,
就會煮呢個做晏晝: 蝦米紹菜煮粉絲

用一大個紹菜煮一扎粉絲, 今次豪少少落蝦乾無落蝦米,
一大鍋都係落咗幾片仔煙鴨胸吊吊味咋!
加埋兔寶寶祖母自家炮製嘅XO醬. 
呢個菜以前呀媽成日煮來俾我地送飯食,
而家大少空口食咋! 我對大少都算係咁喇掛?!

上個星期某一日煮嘅星洲炒米...

其實應該叫星洲撈米至啱!
因為我落好少油, 一痴底就加水炒,
咁樣係健康好多, 不過就無鑊氣囉!
食慣濃油赤醬嘅大少梗唔鍾意啦!
無計啦, 平時佢已經食得好咸好油,
我唔想佢連响屋企食野都咁唔健康,
寧願佢話我煮D野唔好食!
反正我覺得每個人都係覺得自己呀媽煮野食係最好味嘅,
口味嘅野由細養成, 無得變!
不過兔寶寶嫲嫲煮野食又真係幾好味, 又有心機!
嘻嘻, 好似好大條道理俾自己唔去煮好D咁,
但係大少食野少滴油少粒鹽都話唔好食, 好難迎合佢口味!

今次煮星洲炒米買錯咗咖喱糕(我以為係咖哩粉),
不過都幾啱我食, 唔辣淨係香.

****************************************
尋日同兔寶寶响梳化排排坐, 食粉果...
坐坐吓發現佢唔見咗!
原來佢一個屈尾十就爬咗上梳化頂!
海洋公園隻金獅猴係咪走咗嚟我屋企呀?

即時抱返佢落嚟, 唔洗兩秒佢又"琴"返上去!
女呀女, 如果你行路有你爬得咁快就好LU!

兔寶寶: 媽咪, 你整咁大個風車响窗口即係明引我"琴"上去姐?!

兔寶寶: 我要轉風車呀!!