續: 生日節目: 海洋公園一日遊(1)
响海龍皇餐廳食完野, 我地就行返落去水族館睇其他魚魚喇!!
順帶一提, 網上雖然講到海龍皇餐廳又貴又唔好食,
好無食我就真係唔知喇, 我地都無食過,
飲野就OK, 而且唔會比海洋公園其他地方貴多少!
當出面飲一支水都要賣廿蚊嘅時候,
呢度不設最低消費, 飲杯果汁三十幾蚊,
跟住水係任飲!! 仲可以坐响大魚缸前睇魚唔洗响下面同人迫餐C!!
從餐廳上影落去, 下面真係好多人!!
其實我地都唔係想淨係飲野, 不過我地去嘅時候係tea time,
佢响復活節(?!)期間只係供應下午茶甜品buffet, 無其他食物嗌,
但佢又俾我地上去齋叫野飲啵!
咁就俾我地發現呢機嘆冷氣, 避過正午嘅好地方!!
去到水族館, 都係睇吓D古靈精怪嘅海底生物...
毒刺魚、長腳蟹、龍蝦...
我是一條魚, 不是一塊葉...
好多好多條牛奶魚...
用一條魚絲吊住個餵食瓶, D魚糧慢慢咁漏出來引D魚埋去食,
情景真係壯觀.
不說不知, 原來水族館嘅玻璃, 有成68cm!!
怪不得D鯊魚同魔鬼魚點撞都唔爛啦!
响水族館出來, 兔寶寶瞓著咗喇!!
又有員工主動叫我地攞相機出來俾佢幫我地影相,
用我地部機影完後, 再用佢果部相機影咗幾幅,
原來係用我地幅相來整咗D鎖匙扣同紙扎紀念品,
一問要成三佰幾蚊一套, 單買一幅相都要七十幾蚊....
咁我地梗係唔買啦!
事實上用我地部機影出來嘅相都幾靚吖! 洗乜買佢果D呀!
個員工幾好喎, 我地唔買, 佢都仲幫我地影多幾張全家幅!
呢個時候兔寶寶又醒咗喇!!
臨尾去咗熊貓館探安安同佳佳.
安安不停搵野食...
佳佳就掛住瞓...
之後去埋睇金獅猴...
又去埋金魚寶殿睇金魚同錦鋰,
响呢度我都唔想影相, 大少係都要影!
我覺得佢裝修到一格格好似骨灰龕位咁!
玩到六點幾七點就走喇!
出去一望的士站大排長龍, 好彩大少醒水帶我行出少少節車,
唔係至少要等一個鐘呀!
提提大家海洋公園生日者免費就幾時都有,
但係同行一位半價呢個promotion做到8月尾咋!!
果日大少不停咁遊說我晚上去唱卡拉OK,
本來我都想去架! 不過我又唔想同一時間安排太多節目,
我覺得分開嚟玩會開心D!!
於是我地出返去尖沙咀嘅Paisono's 食pizza!!
我地叫咗一個16吋大pizza食!
我食四件, 大少食兩件, 剩返兩件打包!
食完再去麥當奴食雪糕, 飽晒!!
之後慢慢行返屋企.
途中我同大少講, 我好唔想咁快返到屋企呀!
好似一返屋企我嘅生日就完結咗, 正正式式大一嵗咁...
大少仲問我, 咁你想點呀?! 去大排檔炒多個小菜食好無?!
我連忙話我講吓姐! 都係快D返屋企同兔寶寶沖涼吧喇!
點知, 真係開口中, 我地有家歸不得!!
差不多十一點,
返到屋企大少開門, 點知開極都開唔倒度鐵閘.
於是我就用我條鎖匙一試...
邊個咁大整蠱呀? 我同大少同一時間諗,
係邊個咁無聊搵野塞住個鎖匙窿?!
但係我地望入個窿位, 又見唔倒有膠水嘅野响入面喎!
我地個心當堂寒一寒, 因為我地單位有可能有賊入屋!
大少話D賊如果係由窗門入,
就有可能會整壞門口個鎖等人無咁快入倒去!
我地鐵閘係十字鎖, 而大門係電腦鎖,
賊人都唔係咁易入, 要破門的話唔會揀我地個單位!
於是我地走落樓下管理處求救,
都明知個看更幫唔倒我地, 問下佢有無開鎖匠電話都好!
點知個看更話無, 仲叫我地打電話叫朋友幫手上網搵24小時開鎖!
好在大廈業主立案團嘅主席好好人,
知道後帶咗大少跑幾條街去搵開鎖佬!
而我同兔寶寶就去咗附近麥當奴度等消息!
據大少講, 有人開價800蚊, 仲要係不保証成功開鎖.
最後全憑個主席好眼力, 見到張街招搵到個收返公價500蚊嘅開鎖佬,
其實果時已經over12點, 正常係要收貴D架喇!
等個開鎖佬嚟開門嘅時候個心真係七上八落,
好驚間屋真係俾人爆格呀!
我同大少都係第一次有鎖匙而入唔倒屋!
仲要係撞著我生日! 當時嘅心情真係好似由個天空度跌落嚟!
等到十二點幾開鎖匠終於到!
(五一零晨响麥當奴打等嘅又點止自由行吖!
估唔倒我同兔寶寶都係其中一份子
)好彩唔係爆格!
個開鎖匠話係大少鎖門時未鎖晒就"炆"條鑰匙出來,
加上個匙膽用得耐咗有少少滑牙,
呢個係十字鎖好普遍嘅問題!
佢提大少鎖門時唔好急住"炆"鎖匙, 一定要鎖好晒先好"炆".
就係因為一時貪快, 500蚊就咁飛走咗!
不過大少就話無俾人爆格, 已經可喜可賀喇喎!
於是三更半夜我地去咗翠華"慶祝"...我地真係好樂天架, 嗚嗚!!
大家唔洗膽心兔寶寶, 佢仲精神過我!
我要嘅奶醬豬...
大少嘅晚餐, 有雜扒加忌廉湯加豬仔包加餐飲!
食完野沖埋涼, 攪到兩點幾三點, 一撻落床唔洗兩秒我已經瞓著了...
今個生日真係難忘呀!!!
沒有留言:
張貼留言