是日午餐 : 雜米粥 、 豉椒炒牛

5月31日  星期四  陰天


其實係星期二嘅午餐先真.


呢兜唔係泥沙溝石仔呀,
而係白米、紅米 、 糙米 、 紫米 、 薏米 、小麥同蕎麥撈埋一齊.



好多人怕BB吸收唔倒粗糧,
我反而覺得, 吸收唔到最多咪排返出來,
怕傷胃嘅我都係落好少紫米.
其實以前D人都係食粗糧大, 邊有白米食架?!
兔寶寶六個月開始我煲親都落少少雜米, 由少少開始, 等佢慢慢適應,
都無乜問題, 而且好少便秘.
煲耐D煲淋D, BB好鍾意食, 可能鍾意佢好趙口!
習慣咗之後佢反而唔多鍾意食白米粥,
有時前一晚唔記得浸米, 單單用白米煲粥, 佢唔肯食添呀!
大少都好鍾意食呢D粗糧, 可以煮多D做午餐.


再來多一碟豉椒炒牛肉..
第一次炒, 大少都收貨...
包豆豉放咗响雪櫃好耐架喇!
整過一次豉汁蒸排骨, 唔好食.
跟住兔寶寶出世, D人話食豆豉收奶喎!
所以一路都無整豆豉菜色.
而家幫兔寶寶戒中午餐奶,
佢收少少奶仲好!
不過, 我一D都唔覺得食完之後會收奶!
(有D人話食豆豉係唔會收奶, 會收奶嘅係中藥"淡豆豉",
 不過餵緊媽媽奶嘅最好就少食多教訓, 乜豆豉都唔好食啦!)

***********************

而家好難响屋企同兔寶寶影相,
除咗係因為佢行動太快之外,
一發現有人影相....

弊!! 俾人發現咗鏡頭添!

佢就會即刻暫停晒所有動作,
闖過嚟WEAR住我件衫搶相機!