金御海鮮酒家晚飯

5月30日  星期三  炎熱

續: 放假一天

試完衫, 已經九點幾, 大人唔食, BB都要食呀!!
行返出彌敦道, 見到一間食肆豎立的宣傳廣告.
宵夜時段好抵食喎, 於是立刻找出它的所在位置,
呢間就係金御海鮮酒家.

一坐底, 大少見到大支裝嘅喜力啤只係十二蚊,
忍唔住嗌咗支啤啤佢.

兔寶寶: 呢支乜野嚟架, 有無我份架?!

第一round叫咗蒜茸粉絲蒸元貝, 特價三十八蚊四隻.



豉汁蒸倉魚, 又係特價, 四十八蚊,
不過我地落咗單先記得同佢講"走豉汁",
唯有用滾水洗吓佢俾兔寶寶食, 佢都食咗大半條架!

蠔餅, 廿八蚊, 嚟到見到佢炸得好熱氣,
不過食落又幾好食, 脆卜卜, 仲有好多蠔添!
屋企有五花茶, 唔怕唔怕!!

食食下見到MENU有麵豉炒什菜, 廿八蚊,
咁平, 梗係炒一碟啦!
估唔到咁平都幾大碟吓喎!!

環顧四周, 大部份枱嘅食客都係飲啤酒,
可能個廚師都係預D客人係飲酒客,
以上各碟(除了蠔餅外)我都覺得好咸,
問大少, 佢又話唔覺喎!
攪到我一路食一路要飲水. ..


食到咁上下, 大少又再研究個MENU, 佢飲咗酒係食得多野D,
見到呢個芝士焗大蝦烏東煲, 又叫來試吓.
呢煲真係好正呀, 條條烏東都掛滿芝士汁,
D蝦又好味, 而且味道啱啱好,
唔會太咸, 又係宵夜特價, 五十八蚊.

兔寶寶食飽飽, 坐响度研究個汽水樽.



連埋每人十八蚊茶芥, 埋單二百七十幾蚊,
係就係好抵, 不過大少好眼,
見到服務費係12%而唔係加一.
呢點我就覺得有點兒那個喇!
我地幫襯嘅只係平日嘅宵夜時段,
雖然D侍應生好殷勤咁走過來撩兔寶寶玩,
但係服務又唔係話特別好, 唔值加多兩個%.
其實佢加12%每100蚊只係賺多兩蚊雞,
茶芥佢貴返少少條數都响返度.
又或者佢响MENU度寫明要加12%服務費,
咁我地會順氣D囉!