兩餐外吃晚飯

5月16日  星期三  炎熱

星期一果日游完水已經四點幾五點,
早餐只係飲咗杯奶嘅我好肚餓,
雖然行出九龍公園有好多食肆選擇,
但都忍唔住行過泳池隔離麥記, 同大少share一個麥樂雞加大餐;
食完M記, 大少再响附近沾仔記食咗碗淨雲吞.




返屋企放低水泡同埋洗落機衫,
已經六點鐘! 係時候食晚飯!
去咗聯邦酒樓吃.
嚟呢度食係為咗叫佢個冬瓜盅, 晚市特價78蚊.

清清地, 好啱夏天食.

好多料架!

再叫多條青斑仔, 又係特價88蚊.
呢條魚兔寶寶吃咗一大半.

我地出外吃飯, 通常都係叫住一兩個菜先,
待會吃到咁上下再叫其他餸.
點知....兔寶寶中途開大!
返屋企放底水泡果時又放底埋D尿片!
無得換片, 唯有快快手手食埋D野返屋企.
呢一餐埋單222元.

返屋企同兔寶寶沖完涼換完衫,
順手掠埋機衫.
大少提議去官涌大排檔吃多一兩個小菜.
於是又叫咗一碟芙蓉蛋.

再加一碟累椒牛柳,
雖然炒到水汪汪, 但都幾好食.

事頭婆好好人送咗兩碗例湯俾我地,
大少仲讓埋佢果碗俾我飲.
不過, 呢個大排檔無冷氣,
由屋企行到入去, 我已經覺得自己好似焗桑拿咁;
飲完兩碗例湯之後, 我熱到想殺人.
每碟餸我食咗兩啖就停筷了(好少可架!)
兩個餸有三份二打包拎走.
我同大少講, 以後要去大排檔都好, 唔好再去官涌呢間,
因為又唔係特別好吃, 又唔係平,
最重要係無冷氣!
要去大排檔的話(大少好鍾意大排檔吃小菜, 佢話夠鑊氣喎!),
去旺角花園街果間吧!
果度又好吃, 又有冷氣, 價錢又同官涌差不多.

其實而家去大排檔D餸嘅價錢同酒樓差不多,
係碟頭大碟D, 又無茶芥加一果D.
如果唔係兔寶寶揀錯時候"便便", 我就唔洗焗桑拿咁焗喇!!!

熱成咁, 兔寶寶都懶得攪事,
同我一樣絕食抗議---全程都無要求過食我地D野!
又係好少可!!