新買嘅焗爐有旋轉烤雞功能, 於是星期四果日,
就買定隻雞, 等尋日下晝整....
去到佳寶, 咁啱佢做緊週年節慶, 所有貨品照價再九折.
有好多雞, 又芝麻雞, 又三黃雞, 花多眼亂, 可惜全部都有頭架!!
唔知點解我一見到動物嘅頭我就會好驚,
腳都軟埋, 正正式式嘅手無博雞之力...
咁得兩條路: 一係去買新鮮雞, 叫人幫我斬咗佢個死雞頭落嚟
,一係就買細隻D, 來佬貨春雞...
我咁姑寒, 緊係買春雞啦!
買兩隻返屋企, 假如一隻攪彎咗, 仲有一隻補飛....
溶咗雪之後, 就用一大磚南乳, 加兩大匙沙糖,
裡裡外外搽勻佢,
為求入味, 我仲將一D南乳醬搽响皮與肉之間,
醃一晚....
仲買埋薯仔同粟米, 諗住放响隻雞下面一齊焗...
時間方面, 參考網上其他人嘅做法, 個個都唔同,
於是我憑住我焗咗兩次野嘅經驗,
用200度, 先焗20分鐘...
望一望, 應該差唔多,
再用150度, 焗多10分鐘....
不過原來用旋轉烤雞功能, 係唔可以放食物响下層焗的, 會阻住隻雞轉,
咁D薯仔只好拎去烚了...
登登登櫈....
係咪好吸引呢?!
好香, 好夠味, 仲好滑添呀!
連最厚肉嘅雞胸部份都好滑,
留起咗隻雞脾俾我呀媽食之後,
我同大少, 就非常豪情咁用手撕來食...
大少話, 以後唔洗响酒樓食雞喇!
緊係啦, 我呢隻係名副其實嘅南乳吊燒雞嚟架!!
今次嘅焗爐測試, 係非常非常成功架!!
*******************************************************************
沒有留言:
張貼留言