食物喜好

11月23日 星期三  晴天

呢排可能揹得兔寶寶出街多,
條腰好疼呀!!
呢兩日都唔想帶埋佢出去買餸;
雖然上午留兔寶寶响屋企話就話有大少睇住,
但大少睇住佢嘅方式只係放佢响張床嘅一二面自己瞓覺,
又或者打機唔理佢!
咁樣我就寧願自己辛苦少少,
帶埋兔寶寶落街, 反正BB好鍾意落街街呢!



我都有試過推埋BB車去街市,
但我覺得真係好唔方便!
街市已經夠狹窄架啦,
推埋車仔真係成條路我擺晒!
費事乞人憎啦!
最衰係我呢頭D超市唔係响二樓就係响地牢,
仲要係無lift果隻, 唔係無咩買果日都可以唔去街市去超市.
不過我抖咗兩日無做運動休息吓條腰又好似好返DD!!

**********************************************

踏入七個月, 呢十日都開始俾D肉類兔寶寶食.
唔係驚佢營養唔夠,
最主要係身邊有朋友嘅朋友因為太遲俾D要咀嚼嘅食物佢囡囡食,
攪到個女有語言障礙!
所以我都唔敢太遲俾兔寶寶o趙野!
豬肉, 魚肉, 雞肉都試過喇!
好明顯佢對豬肉唔係好受落,
(呢點好似我呀!)
我已經磨到好碎, 甚至溝埋落南瓜一齊俾佢食佢都麻麻地鍾意,
個口唔擘大!

到而家兔寶寶食過嘅有:
生果: 香蕉, 牛油果, 木瓜, 蘋果, 啤梨, 龍眼
蔬菜: 菜心, 皇帝菜, 紅蘿蔔, 南瓜, 粟米, 脆肉瓜
穀物類: 米糊, 粥仔, 麵包, 麥皮, BB手指餅, BB餅, Quinoa
蛋白質類: 蛋黃, 豆腐, 豬肉, 魚(青斑), 雞肉

上面咁多樣野,
你地估吓兔寶寶最鍾意食乜野?
俾個貼士大家吖!
唔係甜嘅食物嚟架!!
兔寶寶食親呢樣野,
個口就會擘到好大,
好似驚我餵唔倒咁...
仲追住我餵佢食, 餵遲D都呱呱叫, 好攪笑架!!

兔寶寶: 媽咪, 其實我最鍾意食手指呀!!