今日又再打一次尋日打咗兩次嘅文,
係關於過去星期一我地入屯門嘅...
今次打C我都响wordpad度打咗稿先喇!
呢一日嘅晏晝約咗我朋友呀JOE飲茶,
我地搭西鐵去到屯門站, 再轉輕鐵去市中心.
原來大少係第一次搭輕鐵嘅, 即係兔寶寶都係啦!
本來我地想去稻香, 行到上去市中心第一眼就見到美心皇宮,
反正我地果頭無美心, 咁就搵位飲茶喇!
以下相片全部矇矇地, 後期先發現兔寶寶摷過我手袋攞部相機出嚟玩,
鏡頭有佢手指仔嘅指紋! 有証有據唔係屈佢!!
兔寶寶: 等我整個無辜樣出來, 扮唔關我事先...
原來呢間美心嘅茶市係好抵的, 大中小點均有特價之外
仲有優點推出, 只係$10.8咋!
唯一唔好處係剛剛開始茶市時有D食客會湧去有優點嘅車仔度搶,
我地坐房仔又唔熟地頭就得個望字.
其實都唔洗搶吖, 根本一路食落去都會出優點,
後期連棉花雞呀、雞扎呀呢D大點都變成優點添!
真係好抵食架!
我地叫咗: 蝦膠魚肚、柴魚花生粥、腐皮千層...
牛肉、棉花雞、鯪魚球、鮮竹卷...
仲有棉花雞同一個白飯(因為兔寶寶乜都唔食, 所以嗌個飯"質"飽佢, 佢好奇怪, 鍾意食白飯...)
埋單都係百六蚊, 照咁計仲平過十幾廿年前响美心飲茶呀!
成餐飯都係大少噴口水多, 我就忙於餵兔寶寶食野, 唔係好多時間同呀JOE傾計,
下次一定掉返轉, 要大少湊女!
臨尾同呀JOE哥哥影相, JOE哥哥話日日都有睇我地個blog, 係兔寶寶fans嚟架!
到時我同兔寶寶做fans又點話吖~
又同大少玩騎牛牛, 無論騎果個同做牛果個都一樣咁開心...
玩樂之餘, 兔寶寶都不忙工作, 同非洲嘅客戶傾單大生意.
我唔係吹水架! 你睇兔寶寶嘅非洲話, 係非常流利架!
食完野, 同呀JOE分道揚鑣, 
我地就返娘家喇!
沒有留言:
張貼留言