大少放假日

4月19日  星期四  雨天

連續幾篇網誌都係圍繞兔寶寶生日,
係時候講下其他野喇!
星期一大少放假果日, 我地下午去咗elements....
我又係食pizza呀!! 驚大家睇到悶, 都無影相喇!

兔寶寶又學行喇!
不過行行吓有對長者couples叫我地唔好咁快俾BB行,
因為睇佢對腳好似未ready咁,
最好要15個月先好俾佢行咁話, 唔係對腳會O形喎!
攪到我同大少都唔敢再俾兔寶寶落地行.
不過尋日去健康院, 個姑娘話如果個BB已經會自己扶住張梳化打橫行,
咁就即係已經ready好, 可以放心拖住佢行架喇, 無話會變O形腳嘅.

又扯遠咗...
星期一果日都係好似今日咁落大雨架, 仲係黃雨添!
行完elements都唔敢四圍去, 晚上去咗官涌市政大廈嘅大排檔食飯.
無BB櫈, 大少將兩張櫈疊埋一齊俾兔寶寶坐.

同大少一人叫一個餸, 我要滑蛋炒牛肉:

大少要咗椒鹽雞翼, 我諗呢度有超過一磅雞翼呀!

送咗花生眉豆湯, 雖然大半碗都係"渣", 不過淡戌戌,
無味嘅, 大少唔吼, 我就俾咗D眉豆兔寶寶食.

想叫白飯, 見隔離枱嘅人叫咸魚雞粒炒飯,
於是叫一碟. 事頭婆話炒飯有分大同細,
咁我地兩個人, 梗係叫碟細啦!
上枱嚟到, 細碟都好大碟啵!!

埋單一百三十幾蚊, 雞翼同炒飯都食唔晒,
有得拎走. 大排檔真係抵食夾大件呀!
食完晚飯我地仲上咗市政中心嘅活動室睇人學柔道,
咁啱撞到東亞運動會嘅香港代表响度練習,
真人表演好睇過睇<<拳王>>呀!!