到宜家傢俬開大餐

10月28日  星期日 

聽日我地就會正式搬屋呀!
不過仲未搬寬頻呢!
嚟緊有兩日無得上網喇~

剛剛過咗嘅星期一, 
我地出咗去九龍灣, 約咗去法國婚紗睇上次影嘅合家歡相.
响睇相之前, 我地去咗mega box嘅宜家傢俬開餐呀!

去到餐廳雖然尚未到12:30, 但已經有不少人在排隊!
為免食食吓唔夠食, 仲要一點鐘打後lunch hour仲多人,
我就一次過買定多D, 足足用咗三個盤呀!


呢個好似係磨菇蛋餡餅,
外表唔多靚仔, 見佢特價只係九蚊雞所以叫咗.
原來佢表裡如一, 食味同賣相一樣都係麻麻地.
當佢係一個麵包食就OK嘅,
不過九蚊個包又貴咗少少.

每次去IKEA必定叫嘅雞翼,
怕不夠吃一次叫夠八隻,
點知大少玩野(又話要減肥喎!)一隻都不吃...

凍蝦杯...
呢個又係每次去都叫,
最鍾意佢D蝦有蝦籽....

這個是什麼"芝士吉列青鱈魚配薯蓉",
我是為了"芝士"兩個字而叫的, 當然也因為我們都喜愛吃魚.
不過我吃不出芝士味, 那塊魚也不太好吃.
這碟東西好似係廿九蚊.

呢一碟係新出品: 三式三文魚冷盤,
同樣是廿幾蚊.
呢一碟我就覺得幾好吃, 煙三文魚是厚切的,
味道正正常常不會過咸.
中間好似一塊小鬆餅的東西, 近看更似一個泡芙,
其實我也不知道是什麼來的, 不過又幾好吃,
有點似加了很多三文魚落去做成的鬆餅,
我懷疑成份當中加有IKEA出品的三文魚醬.
果兜好似雜菜沙律的東西, 入面有為數不少的蝦仔.
未吃前我曾想過一條條白色的會否是芝士條?!
吃過後當然知道我是發夢啦! 廿幾蚊邊得嚟加咁多芝士俾你...
我食完都唔知係乜野來, 不過佢又整得幾好食.

仲有炸薯條...
點知...................
兔寶寶見到呢碟薯條就再不肯吃其他東西了~

又係必叫的肉丸...

再加埋一杯汽水, 呢餐埋單一百四十幾蚊,
食到我很飽呀~~
我地仲好好彩搵到張大梳化來坐添~

未食之前, 我地仲專登幫兔寶寶影返幾張相,
比拼下~



因為差不多一年前嘅兔寶寶都有响同一張櫈影過相呢!
相對果陣時, 宜家就比較難引兔寶寶笑,
無以前咁"順灘"受人擺佈了.

而且仲比以前更加坐唔定,
食食吓要攪吓事, 又摷吓我手袋咁...

呢, 呢三幅就係大少幫我同兔寶寶影嘅合照喇!
你話呢個攝影師幾咁掂呢?! 寫實到佢吖~

因為兔寶寶坐得不耐煩, 加上佢呀媽貪得意,
我地食食吓搬咗去一個遊戲圈外坐, 等兔寶寶自己响入面玩,
我地响出面一面食野一面睇住佢.

其實無乜特別野玩架,
D小朋友响個圈入面走吓、跳吓、碌吓地沙咁,
兔寶寶就好似好忙咁左穿右插, 不亦樂乎.

食完野, 未夠鐘睇相,
本來打算帶兔寶寶去IKEA新開嘅兒童天地度玩一陣...

點知....就係差少少(其實都唔少),
佢唔夠高呀~

唯有响出面"裝"吓佢有乜野玩,
見到都有不少小朋友預約, 每節有45分鐘,
只限小朋友入內,
不過我地去嘅時候都係一點多D(仲要係平日),
見到果時攞飛嘅小朋友要成四點幾先有得玩,
有興趣嘅家長要早D去攞飛仔預約喇!

無份玩, 兔寶寶都無失望,
去搵周公傾計.