行太平山 + 掃墓行

3月18日  星期一  晴天

星期六, 撇甩大少,
和公公婆婆同舅父一起去太平山行山.




呢日兔寶寶好似知道有得玩咁, 七點多就起咗身.
十點幾, 我約咗呀哥响鑽石山地鐵站等, 再乘VAN仔上山.
在行山之前, 我地要拜山先.
等緊呀公呀婆買香燭冥鏹之時, 我地到兒童遊樂場玩住等...

呀哥知我想有多D同兔寶寶影嘅合照,
好識做咁叫我企埋去...

呢個遊樂場雖然無鞦韆, 不過都幾多野玩...

兔寶寶就最鍾意做李小雙, 玩吊環.
單臂都難唔到佢,
有人抱住吖嘛~

玩到唔捨得走, 唔肯去拜山添!

拜完山, 老豆C都唔肯搭小巴,
即使小巴嘅車費比巴士還要平,
又唔洗兜咁多路,
佢都係唔搭...
等咗好耐先有架3C去佐敦.
先去酒樓食LUNCH,
除了點心和炒飯, 仲叫咗兩隻乳鴿..



兔寶寶手拎住1/4隻乳鴿,
都唔知佢係食定"梅"了,
總之就梅咗至少半個鐘...
兔寶寶: 啜乳鴿好味過啜手指呀!


食完飯, 我地就行去天星碼頭, 搭小輪去中環.
週末, 成艘小輪都是遊客, 其中十成九都是自由行.

搭完船再搭15号巴士上太平山, 剛剛送車尾,
要等成十分鐘先有另一班車.

上咗巴士無耐, 兔寶寶終於捱不住瞓著咗,
要勞煩公公抱落車...
落咗車, 呀B仲未識醒, 中下中下咁.

山頂廣場超多人, 好彩我地唔係嚟呢度...

行山徑少人好多, 空氣都好好多!
放返兔寶寶落BB車, 就開始我地嘅行山旅程喇!
而呀B呢D咁有大志嘅人,
梗係繼續放長線釣大魚啦!

呢條山路很平坦,
加上當日天氣很好, 有風唔曬唔熱又唔凍,
沿路都見到很多一家大細帶推著BB車去行山.

不過過咗無幾耐,
舅父就唔抵得, "夾硬"整醒呀B.
嗱, 我提醒過你架喇, 夾硬整醒呢隻懶瞓豬,
佢隨時軟皮蛇瞓响地下架!
宜家坐响度咪算俾面你囉~

呀婆於是告訴兔寶寶, 前面有野玩架!
行行吓, 果然有個吊架!
兔寶寶手指指又跳兩下, 以為自己跳高就掂到上面...

想表現身手?!
又要麻煩舅父騎膊馬喇~

下面有舅父, 後面又有呀婆頂住,
單手當然無難度~~

嗱, 要高難度D,
舅父雙腳離地, 即係呀B都簡接雙腳離地啦!

以為呀B好大膽, 要佢企响棵樹嘅Y叉位,
佢C都唔肯呀!

玩完呢一度, 繼續行呀行;
我負責推BB車, 而舅父就負責氹呀B不斷向前行.

前後包抄, 等佢無得行行吓打倒退...

行到咁上下, 見到棵藤樹喎~

摸吓D藤啦!
兔寶寶又係唔肯...
知女莫若母, 呀B都係愛護環境, 眼看手勿動姐!

再行耐少少, 就見到山下漂亮嘅景色了,
不過呢日都幾大霧吓, 唔係好望得清D樓.

好似積木咁嘅樓宇...

圍住太平山行了一週, 如果是成人慢慢行,
不用一小時就行完了.
我地拖住兔寶寶, 幾乎用上多一倍時間.
不過呢度真係幾好行, 下次可以捉埋大少一齊去.

行完山去返山頂廣場,
離遠就見到有架15号巴士,
呀公快手從BB車上抱起兔寶寶,
惹起呀B的不滿, 在公車上放聲大哭...

兔寶寶: 我一條腳毛都未留底就抱我走!