超簡易芧屋芝士凍餅

5月4日  星期日  雨天

婆婆和舅父來之前一晚, 

臨時臨急, 才想起做個蛋糕出來.

剛巧那天芧屋芝士做特價, 

買了一盒, 

又趕忙去超市買了盒最小裝的忌廉, 

做了一個凍餅.

真是太趕忙, 

餅底也來不及做.

家裡只有甩底模, 

怕未凝固前蛋糕漿會從隙縫中漏出來, 

用手指拈碎了一條即食小蛋卷, 

塞在模底的邊邊, 形成一個圈~

睇過網上幾個芧屋芝士蛋糕都是要焗的.

其實早在兔寶寶生日時我已經在心裡想了一個做法.

宗旨是要有小小公仔吸引呀B, 

又不能畫上去(畫功太差),

又不想嘥一百幾十買個大卡通蛋糕模, 

可能整果一次半次~

最後在烘焙店買了一隻兔仔矽膠模, 

只是十多元, 

倒在平滑的蛋糕上當裝飾, 

比買一塊現成的糖花更為經濟抵玩~

 

本來係無諗住發忌廉, 

就咁倒入去, 好似布甸咁嘅質地.

但到正式整時才發現啫喱水太多, 

怕會漏漿先打起D忌廉令佢杰少少.

所以蛋糕食落就有少少似梳乎厘了.

好耐無整蛋糕, 

呀B又趕住要瞓, 過程有點雞手鴨腳...

心想就算唔食得, 正日再買返個都得!

擺明係當舅父同呀婆係白老鼠! 

幸好最後雖然唔太好睇, 

但真係幾好食.

以下就是凍餅的材料, 

寫下讓自己當作日後參考.

芧屋芝士.....一盒(過篩兩次, 兔寶寶趕住瞓的關係, 我用了攪拌器)

淡忌廉...一盒(約200ml, 就是超市能買到最小裝那種)

任何味道啫喱粉...一盒

魚膠粉...2片, 共5克

糖...兩三匙, 我用了代糖

做法:

1. 先把啫喱粉全倒在杯子裡, 沖入約300ml大滾水, 攪至全溶.

啫喱水要比平時整啫喱開杰少少, 因為蛋糕漿不能太流質, 

同時整兔仔啫喱部份也要實少少才容易倒出來.

2. 倒少少入卡通模, 放入雪櫃.

如果唔整啫喱部份, 

可以唔用啫喱粉, 由於水份少了, 

也不用額外多加魚膠粉.

3. 放芧屋芝士入攪拌器和少少啫喱水入攪拌器攪至滑身, 

這部份可以用過篩代替.

4. 遂少倒入全部啫喱水至芧屋芝士中.

5. 忌廉加糖打至結實.(我是想蛋糕漿較杰身點, 無咁易從模底漏出)

6. 遂少把忌廉攪入芝士漿中.

7. 倒入模中, 放入雪櫃凝固

8. 把啫喱倒上蛋糕面, 再用生果裝飾即成!

 兔寶寶見到我拎蛋糕出來就發晒芧, 

舅父阻擋佢走過來讓我插上蠟燭, 

佢出盡九牛二虎之力都要推去舅父,

仲出到捐褲襠呢招!

因為三個大人掛住睇呀B發芧, 

竟然忘記了拍底兔寶寶吹蠟燭和切蛋糕的一刻..

(係呀, 佢當正係自己生日架!)