秋季旅行

11月17日  星期日  晴天

今日同兔寶寶參加了協康會舉辦的秋季旅行, 

地點係西貢戶外康樂中心.

報名前問過大少去唔去, 時間上佢係可以出席架!

不過佢嫌早起身、嫌無聊, 所以只係得我同兔寶寶兩個人去,

我地就成為咗團中最少人嘅家庭喇~

雖然感覺係有少少怪怪地, 

但諗吓大少平時放假肉體上都係陪我地去玩嘅,

咁又無需太介懷了.

我還是第一次自己帶兔寶寶去咁遠呢(入屯門娘家另計吖, 可以放低重野), 

又無BB車, 又要帶一大袋野;

幸好成個旅程比我想像中舒服好多, 

將來可以放膽報下團帶兔寶寶去玩了. 

 早上九點三集合, 煮唔切早餐, 

响樓下買個大蛋糕食~

每個家庭都好準時, 九點半開車.

途經曾interview過的幼稚園, 兔寶寶仲有記憶, 

指住要話俾我知嚟過玩.

 來程唔洗一個鐘就到喇~

開始前先有個短講介紹場內設施.

第一站, 去咗室內兒童遊樂場.

 

 

之後去舞蹈室, 有個教練教跳舞.

學生只有我和兔寶寶兩個, 

教嘅都係好簡單動作, 似老人家做運動多過跳舞.

跳完舞去咗壁球場, 有一間壁球室開咗出來做手工藝班.

於是就响入面做咗兩件小飾物.

做完出來, 順路去咗踩兒童單車.

玩完單車, 又係順路去下遊樂場玩~

是日行程因而為係我話事, 所以一切隨心,

行到去邊就玩到去邊, 完全零計劃.

玩到呢度, 我已經攰攰地, 

主要係怕曬...

仲有半小時先"放飯", 所以又返去最近飯堂嘅室內兒童遊樂室.

此時有很多家長和我想法一樣, 

大人想涼冷氣, 細路想玩, 

最好係嚟呢度~

一點鐘, 開飯!

都係食D簡單野, 入得口食得飽咁啦!

兔寶寶掛住玩, 只係用咗十分鐘就完成午餐,

食咗成碗飯....嘅面果浸~~

食完飯, 得返唔係好多時間玩.

但兔寶寶可以玩嘅野早上已經玩過晒了.

於是我就計劃下, 有邊D係可以重覆玩的.

首選係返去壁球室做手工, 

因為呢D收縮膠確係幾好玩,

由一塊透明膠片變成鎖匙扣, 

簡單又有滿足感.

 

做完手工, 又係返入室內兒童遊樂場.

 

之後四圍兜咗陣, 就要集合歸程喇~

兔寶寶由上車瞓到落車, 本來四十五分鐘已經返到灣仔, 

因為個司機唔識路, 竟然响灣仔銅鑼灣兜咗二十分鐘, 

除咗行個大運之外,  仲俾呀B瞓咗一個鐘有多.