又係卡拉OK

3月28日  星期一   冷

等咗成個星期, 大少放假了...

之前大少已經心思思想食多次k-buffet, 叫我响港晶Neway同尖東CEO簡一間....佢成日提起上次响港晶食果D滷水鵝...雖然CEO應該多D野食, 但係如果無滷水鵝大少咪好失望囉! 所以今次都係响港晶訂定位...

一起身就去咗尖沙咀間Big John...食早餐, 即係人地嘅下午茶...

呢度係一個餐, 大少食前面果兩樣: 咖啡 + 炸豬扒
我飲湯+ 蕃茄素菜上海麵...不過D麵食咗兩啖就算...
因為我要食:

藍苺cheese cake..
賣單60蚊有找呢!!

之後我地扮自由行, 行完尖東sogo, 再去行星光大道.....慢慢行...影吓相, 响海皮睇吓人釣魚....又睇下D鷹捉魚食.....超級無聊超級hea....

呢張相係記錄大少响星光大道間"事打不"一坐....
因為佢行行吓話腳指抽筋喎~~~
大少,我唔係幸災樂禍, 又唔係心腸唔好, 不過我一路打呢段文字一路忍唔住"格格笑"囉....

一路行吓睇吓八吓, 又搵吓廁所咁, 好快六點鐘, 可以去唱K了....

大少一馬當先睇吓有無鵝脾食...

無睥呀....大少好識安慰自己, 話鵝片先係最好食.....

今次影唔多相呀, 因為我食食吓完全無咗件事....
到差不多食飽, 我出去攞甜品, 果度負責滷水檔個人問我, 要唔要鵝脾呀? 好靚好入味嘅鵝睥切出嚟呀~

我緊係話要啦! 借花敬佛都好...

睇吓大少幾開心....

佢話真頭有D生日嘅feel呀....

同大少一齊, 我地都好容易滿足同快樂...即使生活係好簡單, 但我好享受同佢每分每秒嘅相處呀~ 而我最開心嘅係見到大少開心!!

玩到零晨十二點幾, 返屋企之前再去食咗碗生滾滑牛粥!!

大滿足~~