4月3日 星期日 晴天

4月3日  星期日   晴天

今朝11點幾就醒了...

大少點幾鐘起床, 叫佢幫手換床單, 因為上次自己一個託高張床褥, 幾乎得番半條人命...

要掠乾D床單都幾麻煩吓, 洗完D衫我地慣咗响廚房掠衫, 我通常都星期日洗, 咁星期日同星期一唔煮飯就唔怕D衫有油煙味啦!

但係大少話我差不多要生, 不如攞D床單落街俾洗衣店洗喎~
咁是但啦, 唔洗煩, 最好!
順便攞埋我個手袋落去乾洗...

之後我地行咗去咗呢度搵食....

上次嚟過食湯粉, 見到人地食飯, D餸好吸引, 今次打定主意食飯....

菜飯呀~

我要鎮江骨菜飯...

跟飯會送咸豆腐花....
好滑, 好香豆味呀~
如果有埋蝦米仲正....
唔鍾意食豬肉嘅我, 都覺得D鎮江骨好食, 我食咗兩舊, 我知大少一定好樂意幫手食嘅...
因為我好快用晒D豆腐花嚟撈飯, 唔多夠喉, 大少問D呀姐再散叫一個豆腐花幾錢...
呀姐話: "加5蚊啦!"
咁抵?! 即加!!

成碗菜飯俾我食晒呀!!

大少叫嘅牛腩豬扒薯粉, 跟冬陰公湯底

宜家我唔食辣, 無試到...
不過大少一條粉都唔食剩, 即係OK啦!

食完叫跟餐嘅甜品, 我同大少都諗住叫B類甜品, 入單時個呀姐話, 你地咪加5蚊叫咗個豆腐花囉, 只可以叫多一樣野跟餐!!

原來個呀姐將我之前問佢散叫嘅豆腐花變成餐...我同大少就誤以為加5蚊有多DD豆腐花, 即係好似人地加五蚊有個油菜咁....

於是大少就叫佢當個豆腐花散嗌, 就計13蚊, 咁我地就可以要番兩個跟餐甜品...

大少嘅桑寄生蓮子茶..

我嘅涼粉豆漿冰...
就生得...可以食涼粉呢!
街市買一舊涼粉又好似太多, 罐頭果D又唔好食, 就响度食啦!!
D豆漿又唔太甜, 啱晒我...

埋單, 因為下午茶時間, 全單有88折, 一共70幾蚊...
如果唔係個豆腐花( 早知收13蚊, 我係姑寒鬼, 我唔會食...), 食咁多野都係60幾蚊呢!
而且感覺健康, 下次食佢D五穀飯....