試新野: 麥麥開飯 + 快速"下火"

1月7日  星期一  寒冷

平時大少都唔會返屋企食飯,
週末時間中我都會帶兔寶寶出外用膳,
多數都係茶餐廳、快餐店咁,
好讓兩母女都感受吓假期嘅氣氛.
呢個星期六响商場四圍行時, 發現麥當當竟然出咗飯!

佢有兩款架,
一款係碟頭飯,
俾兩/三塊漢堡牛肉又或者係燒雞扒做餸,
再加杯汽水做一個餐.
呢個餐無乜特別吖,
咪又係平時果D鞋烚烚嘅漢堡扒又或者雞扒加白飯...
反而另一個好似"卡巴"嘅物體吸引到我!


叫咗一個雞肉飯卷餐, 廿八蚊.
食晒成個飯卷加半包薯條,
食量不小嘅我都夠飽.


卡巴卷住好似rice burger咁嘅飯團,
仲有兩塊切開一半嘅炸雞,
一打開係咁嘅樣..

內餡..

因為有足夠嘅生菜同醬汁, 食落唔會好乾,
不過就食得有D"論盡"!
以麥當當嘅新產品來說唔算難食,
而且食落唔覺得食緊飯, 幾啱無飯癮嘅我!
但可能醬汁有點點辣, 又可能薯條實在太吸引了,
同樣無乜飯癮嘅兔寶寶唔肯食!



同日嘅LUNCH, 煲咗蠔豉皮蛋瘦肉粥.
用現在流行嘅方法,
前一晚洗過米後用油鹽(我再搓爛一隻皮蛋)去醃;
放入冰箱成為"冰米";
到水滾時一放"冰米", 幾乎一滾起就成為米花..
煲了大半煲"下火", 都不用30分鐘.
我仲要係下了米才慢條斯理地剝和切皮蛋,
等佢滾幾滾先落瘦肉粒, 等佢煲到杰杰地先熄火..
一次過落晒所有材料又唔煲咁杰的話會更快呢!