星期二果日, 我地出咗去葵芳行吓,
等呀哥放工過嚟攞D野, 順便吃晚飯.
兔寶寶見到咁多公仔好開心呀!!
襯天未黑晒, 去商場內嘅遊樂場玩一陣.
兔寶寶最鍾意玩大算盤.....第二時係咪想做掌櫃呀?
跟住玩sir滑梯....
仲有BB玩嘅鞦韆, 兔寶寶第一次唔洗大人抱住玩鞦韆,
開頭都幾enjoy架, 玩玩吓舅父話佢塊面好似青青地,
唔知係咪fing到暈呢?!
呢個BB曉行曉走, 睇身型同動作都好似大姐姐咁,
原來細過兔寶寶幾日! 兔寶寶你真係要加把勁了...
個妹妹多次行埋去想同兔寶寶玩, 兔寶寶都唔睬人地,
一反佢平時見到BB就揮手say hi嘅常態
我覺得係兔寶寶見到妹妹行得好好,
而自己唔扶住野一步都行唔到, 所以悶悶不樂呀!
例如BB想行但行唔倒嘅時候都會唔開心.
但呀哥就唔相信, 認為我呢個做母親嘅諗多咗...
之後我地要佢行, 佢仲軟皮蛇咁,
索性坐响地...
舅父: 等我同你玩騎膊馬啦!
兔寶寶: 我想玩你D頭髮多D呀!!
晚上本來打算去和民吃, 但要等兩張枱.
等位其間我心思思又想去樓上稻香食飯,
因為兔寶寶可以食條魚, 於是就遊說呀哥上去吃.
等條魚蒸好等到頸都長, 期間俾本布書BB佢睇,
起初佢都肯坐定定, 後來條魚來了, 點知淋咗豉油,
又要再等佢蒸另一條(枱枱都叫條魚, 我地唔要隔離枱要, 無嘥野)
兔寶寶眼見游到埋嚟嘅大魚俾人攞返走, 就喊起上來,
要俾塊餅餅佢食住先來安撫佢情緒..
魚魚到!
仲叫咗個唔記得叫乜, 係腐皮入面包住D菇菇,
不過實物同圖片差好遠...
食完晚飯都九點幾十點, 要同舅父講bye bye喇!
而家佐敦地鐵站整好咗一部由月台上地下嘅升降機,
以後我自己帶兔寶寶出入就方便咗好多, 唔洗下下搭的士!
响地鐵入面BB本來坐BB車, 坐咗陣又扭計要同我一齊坐.
兔寶寶, 你無買飛, 唔可以擺佔坐位架喎!
出返去九龍, 兔寶寶已經瞓著咗.
我見佢玩咗成日咁好瞓, 仲諗返到屋企沖晒涼就可以好好灘抖下....
點知..........我地個大門又壞咗!
又一次有鎖匙而又開唔到門! 呢把仲要係電腦鎖!
有了上一次的經驗, 我即刻打俾大少, 叫佢立刻飛返來,
試下用佢條鎖匙開唔開到......
結果緊係開唔倒啦!
於是又要搵開鎖佬, 五佰蚊就咁飛走咗!
由於離家時又係由大少鎖門, 我有理由相信佢對手係有D問題,
成日未鎖好就炆條鎖匙出來....
又唔見我成日出出入入會整壞把鎖?!
呢個諗法當然我唔會同佢講啦(不過有可能從我面部表情之中表達了出來)
無論如何我地都要考慮下買返一個唔洗用鎖匙的密碼鎖了.
等待大少歸家時, 兔寶寶瞓到好似豬咁,
完全唔知我地有家歸不得.....
沒有留言:
張貼留言