星期天

12月18日  星期二  寒冷

我地返嚟喇!
今日好凍呀, 又有毛毛雨喎, 我最憎就係咁架喇,
希望快D停雨, 唔好咁潮濕啦!

星期日我地要做冬呀, 所以大少順手請埋假.
一起身就先去酒家仔食個LUNCH先~



唔食飯一排嘅兔寶寶,
呢排又有返飯癮喎~
真係估佢唔倒!

食完飯, 我地行咗去維園.
本來想去工展會架, 不過超多人,
我地時間又唔多, 不如慳返廿蚊雞,
擇日再去過, 於是我地行去隔離遊樂場玩.
兔寶寶俾人拖吓又蹲吓咁,
總算係唔洗人抱自己到達.

去到遊樂場就生猛晒喇, 放電時間到!

佢就放電, 佢呀媽我就慘過做咕喱,
皆因佢不停玩"捐"山窿之後sir滑梯,
吊佢尾全程跟實佢嘅我真係又熱又攰...

好彩大少識做停止玩手機,
幫吓手教兔寶寶玩呢個"搖搖搖"....
呀B好開心呀!

打鞦韆時仲開心!

笑到見牙唔見眼!

兔寶寶: DADDY, 大力D, 打高D!

呢幅係全程唯一我同呀B嘅合照,
仲要係我要求吓大少先幫我影!
大少好奸呀,
第二時兔寶寶睇個blog一定以為淨係爸爸帶佢玩!

兔寶寶忽然好勤力, 玩玩吓都要响BB車度摷本書出來睇,
跟住我地搭地鐵入奶奶度, 佢都係全程(扮)望住本書,
人地唔知仲以為呢個BB咁好學呀!

我地去咗富臨做冬, 超多人做節,
又貴又唔好食之餘仲係零招呼!
都費鬼事影相!
食完飯上去奶奶度食埋湯圓, 之後我地就搭巴士轉火車去深圳LU!
搭火車時兔寶寶攞住表哥送俾佢嘅計數機响度篤篤篤,
紅衫紅褲襯埋部紅色計數機,
呀紅掌櫃, 關照吓喎~