提防小手

12月17日  星期一  寒冷

其實呢兩日我同大少都上咗深圳揼骨架!
呢兩篇都係寫定嘅!

兔寶寶嫲嫲成日都會攞D餸過來架!
因為佢知我晚餐係自己食, 通常都唔會點煮餸,
所以一星期總會有兩三日一盒二盒咁攞D餸上來,
等我加熱就食得!

呢一日佢又叫大少拎咗幾盒餸同湯上來,
其中有一小盒上海烤麩, 齋食會覺得太咸,
於是我就加咗一小棵西蘭花、一條翠玉瓜、一條甘荀來加工,
煮起一大碟夠我做晚餐!

D蔬菜索緊D味, 對我來講空口食係啱啱好!

見唔見有隻"小"手响度攪攪震呀?

呢個百厭星, 一路講"熱熱",
一路要攞起棵菜放入口...
係呀, "熱熱"係佢最近會講嘅字呀!

連我都覺得熱, 呀B竟然可以拎起一舊放入口(雖然好快丟底),
莫非佢練咗鐵沙掌?
大家唔好話我好唔阻止佢呀!
我覺得一D唔係認真危險嘅野, 俾佢掂吓痛吓有個經驗都好,
有大人睇住, 唔係成碟倒晒落個身度就得...
至於真係太危險嘅野, 例如刀呀、火呀、滾水呀呢D,
梗係掂都唔俾佢掂啦!

好喇, 攪攪震無幫襯,
唔好阻住媽咪開餐, 要坐監喇~

兔寶寶知我無咁恨心嘅,
唔係坐監, 只係埋位食菜姐!
兔寶寶: 好野, 有得食!