3月11日 星期五 晴天
大少尋晚鬼咁神心, 較定鬧鐘13:00p.m.起身梳洗飲茶.
等大少洗完頭, 沖完涼, me me 摩摩咁, 行得去酒樓, 已經係兩點下午茶時間lu!!
叫咗三個點心孖寶:
有皮蛋瘦肉粥....計返係六蚊碗, 抵過自己煲!
脆皮炸茄子.....即係魚肉鑲茄子, 呢碟大少食晒~
硯芥鯪魚球......我食咗一粒!
糯米卷拼馬拉卷.....呢籠大少淨係食咗一舊糯米卷...
燕麥雷沙包.......大少食兩個~
山竹牛肉.....我食一粒, 加埋全部腐皮....
另外仲有三個下午茶特價點心:
碗仔翅 ($7.80): 好多料呀!! 最鍾意木耳同竹笙, 成碗我食晒~~
腐皮雞卷 ($6.80): 我食兩條
仲有臘味糯米飯.........'撩'走D臘味後成碗我食晒~~
大少鹽唔夠喉, 叫多個:
杏片蝦丸
拼: 白灼西生菜
兩個人夾手夾腳, 以上點心一件不漏咁食晒~~~
埋單一佰零四蚊!! 超值呀~~
(尋晚突然好眼瞓, 十點幾就恰著咗, 大少打返嚟都聽唔到~
無煮消夜俾大少, 佢返到嚟好慘咁食咗兩個雞尾飽咋!! 所以佢今朝好肚餓....)飲完茶, 去咗惠康買D野, 之後我地有另一個行動呀!
話說星期一同隻龍蝦一齊買返嚟果四條魚仔, 雖然我地已經撈起佢去另一個水桶度養, 又加氧氣珠又加生命水咁, 但係依然阻止唔倒佢地一條又一條咁走去賣咸鴨蛋呀!
今日死剩一條咋~
落 街飲茶嘅時候, 我地响屋企樓下間酒家仔發現咗個金魚缸, 入面養咗幾條好細嘅金魚仔....我同大少忽然靈機一動, 屋企果條魚仔有救喇!! 正所謂 "救人一命, 勝造七級浮屠", 我地救條魚, 應該都有勝造一級浮屠嘅陰德嘅......於是我地靜雞雞咁放咗條魚仔响人地個魚缸度!
搬家後條魚仔生猛晒! 成功幫你搵到處好人家, 希望你好食好住啦~ 我地落親街都會探你嫁!
沒有留言:
張貼留言