年廿九深宵拜車公 * 笑口常開兔寶寶

年初二  星期二  寒冷




兔寶寶: 祝大家新年快樂!!
              鴻運當頭!
              笑口常開!!!

兔寶寶人生第一個農曆新年,
對佢嚟講應該係又新奇, 又好玩, 又疲累吧!!!

按我地習慣, 年三十晚係會响大約十一點鐘左右去到大圍某食肆,
一路食野一路等十二點踏入年初一,
食飽飽就去車公廟祈求來年事事順境.
所以年廿九果日晏晝我就氹定兔寶寶瞓返三個鐘頭晏覺,
等佢夜晚無咁攰...


等拜車公....

到拜完車公, 已經點幾鐘,
仲要去行花市...
今年過年真係好趕,
平時我地係年廿幾嘅時候已經去咗花墟買年花,
今年係第一年踏正年初一去花墟,
已經半夜兩點鐘都超多人,
仲要封路添!
不過兔寶寶已經熟睡,
抱佢上車落車都唔知醒...

今年太遲去買花, 所有百合都俾人買晒!!
行來行去選來選去,
我地買咗一盤好細盤嘅鬱金香咋!!
買完花已經三點幾, 兔寶寶都醒晒,
我地決定等四點鐘响麥當奴食埋早餐先返屋企!!

睇下兔寶寶幾精神!!
影呢幅相嘅時候已經係(朝頭早?!)四點幾!!

返屋企瞓一瞓又要準備拜年豆利是,
兔寶寶好似知道係年初一咁,
一反作風, 竟然邊個抱佢都肯!!
仲要笑口迎人,  錫佢都唔避喎!!
晚上响酒樓食飯時不停咁電人,
係咁氹人玩,
電到隔離枱唔識嘅EE都俾利是兔寶寶!
呵呵, 媽咪代為收利是,
真係笑到四萬咁口!

今日年初二大少要返工,
希望大少開工大吉, 生意興隆, 財源滾滾, 一帆風順啦!!
兔寶寶今日休息一天, 聽日赤口都要去拜年呢!!