又係屯門一日遊

7月31日  星期二  晴天

尋日朝早我同兔寶寶都好早起身呀,
大家都瞓得好少, 卻又好好精神.
於是我做咗一個都幾錯誤嘅決定,
無用BB車同揹帶嘅情況下就帶咗兔寶寶去一處幾遠吓嘅地方食早餐.

食早餐之前我仲帶埋兔寶寶去街市買定少少餸同生果呢!
買完餸返屋企放低, 又再出發.
其實我係想去家鄉雞食早餐!
上次見到有個蕃茄通粉早餐只係12個大洋, 好想試吓呢!
由我家出發去最近嘅家鄉雞,
大約係由柯士甸站走到去莊士倫敦廣場,
話遠唔遠, 但都要走九條街.
我拖住兔寶寶慢慢行, 停吓走吓又抱吓咁,
行咗大約九個字, 终於到了..

12蚊一個早餐係包括D咩呢?
就係一碗得幾粒粟米做餸嘅貝殼粉,
成碗大約係150ML左右啦!
其實我買嘅時候都估到的, 因為買其他正價早餐加5蚊可以換到這個通粉.
我唔係話呢個早餐唔抵, 始終12蚊, 可以要求些什麼呢?
當坐底嘆吓冷氣都要啦!
我只係覺得自己好ON居, 行咁遠咁辛苦就係為咗碗咁嘅野...
更ON居嘅事情發生咗, 就係兔寶寶只係食咗三粒半貝殼粉!
係細細粒粒果D貝殼粉!
點解係三粒半呢? 因為食第四粒佢已經LUR返半粒出嚟!
我真係覺得自己玩緊自己, 晨早流流行咁遠就係為咗三粒半貝殼粉!
(註: 我一起身時已經吃了麥皮, 其實我是完。全。唔。肚。餓。的!)

啃埋碗粉, 又再一次趕路, 回程返屋企.
太陽比之前更猛, 兔寶寶又行得慢,
避免乾煎, 我幾乎係全程抱住佢返去的.
行咗一段仔路我已經想截的士返屋企了.
不過我一諗到的士錢(雖然係唔洗跳錶, 廿蚊雞)仲貴過早餐錢,
我心入面就有個強大信念: 萬萬不可!
唔係我會覺得今次家鄉雞十二蚊早餐事件更ON居....

返到屋企已經十一點幾, 無錯, 由八點幾出門口買餸起計,
一共騰咗三個鐘...
跟住跟醒大少, 換衫入屯門, 搵公公婆婆飲茶.

本來以為一返折騰之後兔寶寶會瞓返陣, 點知佢仲精神過我,
我地都覺得, 佢心入面都有個時間表, 大約知道大少幾時放假,
幾時有街去, 心水好清!

我地早D去酒樓搵位, 等公公婆婆期間, 未有野食,
食住匙羹先啦!


兔寶寶: 匙羹又幾好食喎~

呢間美心雖然幾抵食, 但係好逼,
同鄰桌嘅食客幾乎是背靠背的...
叫咗幾個點心, 同一碟菜遠牛河, 埋單180元.


飲茶期間大少不停話要跟埋公公上山(除咗落雨, 爸爸日日都會行吓山的)
大少, 你咪想試吓搭免費直升機呀?
唔行慣山天時暑熱好易暈低的,
到時唔知要我老豆揹你落嚟好
定call999叫飛行服務隊送返你落嚟好....

飲完茶, 公公一個人上山,
婆婆就陪我地行商場...

見到有呢D"吹氣跳呀跳", 好多小朋友排隊玩呢!
可惜兔寶寶仲未夠年齡玩...


唏! 你"螺地"都無用架, 無得玩就係無得玩.

兔寶寶宜家開始人細鬼大,
唔想行又或者唔滿意時, 即時軟皮蛇,
螺地踏腳, 無賴到極...

無得玩, DADDY抱住影幅相啦!


呀婆渣相機係唔同D,
兔寶寶宜家影相好少笑架!

之後去咗冒險樂園, 又去咗玩具反斗城,
行完一輪, 呀婆啱啱收到政府果六千蚊, 去銀行入數,
我地就襯機去食吓我好掛住嘅車仔餸...

兩份鳳爪加一份牛腩,
呢度D鳳爪、腸粉同魚蛋係由小學食到宜家,
食, 係食份感情呀!

呢幅相唔係要show兔寶寶扭計嘅醜怪樣,
係俾大家睇真D上次呀公買果套衫,
係see though嚟架!
沿途好多人話好sexy呢!