續: 北上第一天
第二日瞓到十一點幾, 我地就俾兔寶寶嘈醒咗.
呀B一起身就望住門口, 指住示意要出去玩.
咁我就抱佢去女賓部梳洗, 仲諗住帶佢去JAKUCHI度游水.
點知原來按摩池要由中午十二點半左右先有溫水,
於是我就帶兔寶寶行出去餐廳, 叫碟北菇雞飯食住先喇!
而大少就去咗大堂按腳.
食完飯休息一陣, 兩母女终於可以一齊剝光豬游水,
兔寶寶好開心呢, 原全唔怕水花了.
幫襯呢個場嘅大部份都係香港人,
平時我都唔見有人用按摩池的,
可能成年人都不慣剝光豬吧!
我幫襯過咁多次, 都係浸過一次咁大把,
亦無見人浸過, 成個私家泳池咁俾我地玩,
真係爽呀!
玩完沖埋涼, 我地就換衫出去行陣了.
先去搵野食.
按摩中心附近D食肆都好似好細小而又無冷氣的,
所以我地都行咗去頗遠, 去咗一間應該是連鎖式的腸粉鋪,
叫了一個粥餐.
有皮蛋瘦肉粥.
同木耳雞絲腸.
質素都比香港好, 粉皮很薄;
但我不太喜歡佢地D豉油無加糖煮過咁,
好似就咁生抽溝小小水.
如果配返腸粉豉油就正了.
見MENU有雙皮奶, 八蚊雞,
叫了一碗試試.
上枱見是塑膠碗作盛器的, 已知不對板,
幸好不太難吃.
瞓得不多的兔寶寶, 在我們開餐時,
又搵周公了.
食完野,
行咗陣"金光華", 唔知點解一個咁新嘅商場都好似唔夠冷氣咁,
好焗好辛苦, 大陸嘅商場同食肆好多都係咁,
唔通佢真係較到個中央冷氣係25度?
我試過set屋企部冷氣至25度, 大熱天時係絕對唔夠凍的,
更何況大陸D商場咁人來人往.
於是行返出去, 唔知行去邊好.
我記得大少曾帶我去一個商場,
入面有好多衫賣, 價錢比香港便宜,
D衫又OK靚的.
有D似尖沙咀百利商場的型式.
問吓大少, 佢又唔多記得...
於是我就刺激吓佢男性基本嘅慾望: "呢, 我响果度買咗條碎花裙,
同埋一套好sexy嘅see though 睡衣嘅呢
?!"提起see though睡衣,
大少果然有返D反應
,話個商場好似係响東門喎!
東門?! 咪即係整指甲果度?!
我記得就唔多似啵!
不過既然無頭緒, 咁就搭地鐵去東門啦!
第一次响大陸搭地鐵, 原來同香港差不多,
特別D嘅係單程票係好似一個綠色塑膠籌碼咁,
裡面有晶片, 而唔係我地香港地鐵用磁帶嘅飛.
去到東門, 空氣比前日更污濁.
次次去東門都係去修甲扮靚就走,
最多去果度食串串燒, 同逛吓D兩蚊店.
自從人仔貴過港紙之後我連兩蚊店都無興趣行了,
反正我住果區都有兩蚊店, 唔洗返大陸行.
今次認真少少响東門行吓,
唔知窿路, 真係無乜好行,
一來人多無冷氣, 空氣又差得令我有想咳的感覺,
二來係貨物雖然多, 你話佢唔整齊又唔係,
但總是俾我一種亂的感覺.
唔係無衫賣, 不過D衫一睇就覺得好"大陸feel"...
這時我已經很不舒服, 要大少給我買支冰水,
飲完水又怕無地方去廁所.
行咗唔夠一個鐘, 同我上次去買衫嘅地方差太遠,
反正午餐不是吃了很多東西,
咁就早少少去食晚飯吧!
於是就行去吃晚飯的地方.
行到又熱又喝,
快D飲啖水先!
呢間食肆幫襯過好多次,
愈食愈貴, 愈食愈唔抵.
本來大少係想試吓隔離鋪的,
點知行到門口個部長認得大少,
又招呼佢入佢,
就唔好意思去第二間了.
上次叫個椒鹽鴨舌很好吃,
今次再叫, 炸得乾咗, 無咁好食了...
一打扇貝都是我order的...
叫條魚俾兔寶寶,
問一問蒸貴花幾錢?! 要五十幾蚊...
最後叫了條盧魚, 廿幾蚊, 但唔好食的,
兔寶寶一口也不吃....
大少叫了一碟炒豆苗,
蠢咗一嚟就叫佢要加大,
結果價錢是加了, 碟也大了,
但淨菜量卻同我地平時叫普通的一樣...
仲叫多一碟清炒土豆絲,
唔係大少話要叫, 我一定唔會落order的,
因為我炒得好食過佢...
最後要多一碟現場拉的花生醬薄餅,
最有特色係佢了. 熱辣辣時都幾好吃的.
兔寶寶呢餐又好似練仙咁,
"聞"吓就得喇!
我地有我地食, 佢有佢玩"烹烹仔"...
坐多一陣又扭落地,
企多兩企又扭出街.
好彩呢個時候隔離枱嚟咗對港客同佢玩,
我地先可以他他條條食埋D野.
食完野, 行咗陣超市, 買D零食,
又返去按摩中心揼骨玩水.
大家可能會問, 响按摩中心瞓覺, 安全嗎?
瞓得舒服嗎?
有段時間我同大少返大陸揼骨, 係租酒店架!
不過條數梗係重皮好多!
安唔安全我諗要睇邊個場,
不過我返親大陸都唔會帶太多錢,
同除底D頸鍊首飾响屋企先, 唔著得太招搖我覺得就OK嘅.
我見其他人客嘅打扮都富貴過我,
要偷野應該都唔會揀我嚟偷吧?!
我聽大少講, 响大陸要搵份工都唔係想像中咁易,
要擔保要人事要好多野,
所以D "LOCKER仔"都唔敢有D乜野行差踏錯的.
至於舒唔舒服, 如果你不嬲瞓開張queen size嘅床,
咁呢度梗係唔舒服啦!
我地要求唔高, 又想慳返筆酒店錢,
响按摩中心過埋夜就經濟好多.
如果要响個場內過埋夜, 就一定要留間泰式又或者日式房,
以前我試過留中式房(因為揀中式按摩), 真係瞓到頸都歪埋呀!
想安全D嘅, 咪推張床去頂住度門, 咁就一定唔怕瞓瞓吓有人入房啦!
(不過我地唔會咁做, 因為大少...嘻嘻, 要痾夜尿
!)最重要都係睇吓邊個場, 有D地方真係好嘈又有野咬,
度門又關唔埋, 走廊D光又照到"光燦燦"咁,
呢D咪又無安全感, 又瞓得唔舒服囉.
好喇, 總之我同大少兩晚都瞓得好好,
好到呢....本來我地係約定第三天十一點起身再按多次腳的,
(三日兩人合計按咗十幾二十個鐘, 如果大少再瘦一D, 我真係會叫佢做"骨精強"的!)
我都起唔到身, 因為太好瞓了.
最後大少抱埋兔寶寶出去大堂按腳俾我繼續瞓, 實在太好了.
直到最後大少入來叫醒我, 話唔起身唔得喇, 要check out返香港返工喇,
我先至依依不捨地離開我張床...
同兔寶寶一起沖涼換衫, 乘車返香港了.
去到搭火車, 兔寶寶好似意會到行程完結,
心情完全放鬆地搵周公去了.
後記:
返屋企執好晒野洗落衫,
大少就要出門返工去.
呢個時候兔寶寶一個箭步闖去(是行, 不是爬)門口,
攞起自己的鞋, 並"夾硬"將自己隻腳塞入鞋裡...
我們都想, 佢一定很想再去揼骨呢!
沒有留言:
張貼留言