北上第一天

8月9日  星期四  晴天

星期一果日起床後, 確認一下執齊晒野,
就先去茶餐廳叫一個早餐分吃,
之後就搭西鐵轉火車去羅湖喇!
一早起身嘅兔寶寶就响火車上補一補眠先....


去到羅湖, 過關時一次過遞上一家三口証件,
好快脆就攪掊晒.
我地唔打算坐底食午餐, 响火車站美心買袋麵包咬吓就算喇.
之後去的士站排隊去東門,
差不多輪到我地時大少才發現新大陸似的說: 其實我地可以坐地鐵呀!
早出聲嘛, 下次啦!

去到東門, 兩年幾無來,
原來相熟理髮店同美容院都易手了.
大少去返物是人非嘅"飛髮鋪"剪髮,
而兔寶寶就跟我整吓水晶甲.

個人並不喜歡留長指甲,
平時我都是把指甲剪得短短的,
這樣洗頭才舒服.
過往整水晶甲後不論打字和做家務都很不方便.
要不是下星期影婚紗相, 我先唔整呢!

因為影相, 第一次整有閃石的,
好似好易甩咁.

之後再行咗一陣, 就搭的士去佳寧娜廣場吃晚餐.
我地去咗"大漁鐵板燒"食放題呀!

好多人都揀圍住個鐵板燒坐, 一路食一路睇住廚師"表演",
不過我地怕太煙, 揀坐梳化位, 舒服一點, 空間也大一點.

張藤BB櫈好特別, 但兔寶寶不是太喜歡,
佢想落地呀!
咪玩啦, 你落地我地仲洗食嘅?!

等我地食陣野先啦!
魚生類麻麻, 最好吃是鐵板燒.


鐵板燒中以燒牛脷最好吃, 其次是燒蝦, 燒蠔和燒扇貝,
燒魚都好食, 仲有好多款魚俾你揀...

一個價錢包晒所有飲品的, 有鮮搾果汁, 青酒梅酒紅酒啤酒,
也有各種奶昔酸乳花茶等比較特別的東西.

甜品可以自己出甜品櫃攞,
唔係好多款也不是很出色.
反而水果更新鮮, 有芒果西瓜木瓜等.

食咗一陣, 我地終於不敵兔寶寶投訴似的叫喊聲,
抱返佢落嚟, 同我坐...
(唔好俾相片誤導呀, 影相先係同大少坐咋)
不過兔寶寶依然唔太肯食野...

唔係太多人坐梳化位,
最終俾佢落地.

呢度食放題係不限時間的,
埋單可以俾人仔, 也可以俾港紙,
計返對換率也相差不少, 俾港紙算了.
呢餐埋單港銀四佰一十蚊.

食完大少仲响商場入面放咗一部i phone4,
賣到二千四百蚊人仔, 响香港放最多賣二千蚊港紙咋!
咁我地就有多D人仔作為今次北上嘅津貼了.

******************

食飽飽慢慢步行去按摩中心,
大少帶兔寶寶去JAKUCHI度玩水和沖涼,
之後去非吸煙區做腳底按摩.

坐到00:00, 按摩中心嘅餐廳會提供宵夜buffet,
咁梗係唔係食D乜野好野啦, 叫做有D野食吓質飽個肚..
大家一定會諗: 吓?! 你地食咗咁多野仲未飽?!
係呀, 都話咗我地好大食架啦!

頭先食放題兔寶寶唔食野,
宜家食宵夜先叫做食返多D!
睇嚟佢絕對有條件做夜鬼!

兩日宵夜影咗一餐,
基本上都有有一個菜一個肉一個湯一個粉麵飯同一D粗糧咁.
第一日係炒白菜, 第二日係炒菜芯.
呢餐係星洲炒米同皮蛋瘦肉粥,
下餐就係炒飯同白粥.
第一日有燒鴨做肉類, 第二日就炒咗碟雲耳炒雞出來.
兩日同樣有粉葛湯同饅頭,
而我最喜歡嘅就係食芋頭仔同第二日嘅烚蕃薯.

******************
食完抖多一抖,
就入房按身喇, 我地攞咗間三人泰式房,
到瞓覺時就推三張床埋一起,
連成一張超大床,
宜家兔寶寶唔肯瞓BB床,
平時都係三個人迫埋一張床度瞓,
呢張超大床對我地來講, 真係超舒服呢!