中秋節晚餐--煮飯仔

2011年9月13日  星期二  中秋節翌日

大家尋晚有無去賞月呀??

我同兔寶寶去咗, 望吓個月亮...
今年嘅月亮雖然唔係特別圓,
但都好靚呀~~


去賞月前留响屋企玩煮飯仔...
我好認真架, 一早諗定煮乜...

參考雀后嘅一豬兩味.
我唔多鍾意食豬肉,
細個又瘦又體弱多病, 呀媽經常性"執茶"俾我飲,
飲親個醫師一定要我戒口!
牛肉雞肉唔食得!
餐餐食蒸豬肉!
爸爸又話我瘦, 迫我食煲完湯嘅豬鍵肉...
所以我好憎好憎食豬肉!
其實除了童年陰影,
我發現我係對"騷"味好敏感,
豬肉羊肉鴨肉鵝肉甚至乳鴒,
我聞到一股騷味而避之則吉...
但加工醃製過的,
如火腿, 腸仔, 豬肉乾豬肉鬆呢D就無果一種味道,
德國咸豬手我都OK, 但細細隻果D就唔得了!

晏晝出街前煲定湯:
洋蔥蕃茄南瓜粟米湯:

放咗隻豬手落去煲一個鐘, 之後撈起拎去焗....
Pansy, 我本來叫大少幫我錄起點樣叉住隻豬手,
但係我太睇高自己嘅技巧, take one就錄,
隻豬手又太硬, 叉咗好耐都叉唔到...
結果video係錄咗, 不過變咗攪笑版,
因為大少一路錄就一路幫我配音!
我嘅結論係, 焗豬手放响個焗盤度就得,
唔洗叉起佢!

未焗前:

留意到嗎? 只係叉咗一邊, 另一邊骨頭部份太硬無落叉...

掛住整其他餸, 焗燶咗少少,
不過唔緊要, 我地都唔食皮....

切開影幅相:

下次可以配埋一個黑椒汁更好....
同埋我地都覺得一隻豬手好似好少肉,
一人一隻會更好.....

仲有蝦仁炒蛋...

本來我係想整茄汁蝦碌的,
但一諗起中秋節D蝦可能好貴,
就打消念頭, 改為煮蝦仁炒蛋,
成功打斧頭....
我好心機挑埋蝦腸架!

自己煮嘅蝦仁炒蛋好健康,
除咗用少油來爆蝦外,
成碟餸都無落油,
D蛋都仲好滑架!!

仲有一大碟西蘭花金菇炒牛肉.

今次連D牛肉都係自己切....孖人牌真係掂呀!

飯後仲有過火的燉蛋與燉奶做甜品...

食飽飽就拎埋燈籠去賞月了!!