一日兩餐茶

12月31日  星期一  寒冷

今日係2012年最後一日, 祝大家新年快樂呀!!
大家今日有D乜野攪作呢?
我地就要留响屋企, 等師傅嚟裝過條天線!
係呀, 由搬屋到宜家, 我地都睇唔到電視架~
起初以為係連住電視果條天線壞鬼咗,
換過兩條, 都係睇唔到;
又搵人換過牆身嘅天線制, 分別換過兩次...
最後先發現間屋本身嘅天線原來係壞嘅,
要搵人鋪過!
而鋪天線嘅人呢, 放咗兩次飛機之後,
約定除夕呢日嚟整...
打咁多野....都係想講, 呢篇blog, 係打定架!
預祝大家新年快樂!!!


上個星期四, 晨咁早起咗身,
於是摷醒埋兔寶寶, 走去飲早茶...

呀B逢係飲茶都會乖D架喎,
呢一日佢自己攞本書仔睇,
後尾發現有電視睇先轉睇電視咋~
係啦, 屋企無電視睇, 唯有出街睇啦!


呢間早茶我嚟咗幾次架喇,
不過之前幾次要搭枱, 唔好意思影相...
我一個人都帶BB嚟飲茶,
係因為呢度實在太抵食了!!!

一碗粥加一碟魚滑腸都係十零蚊,
去粥鋪食都唔得啦!(粥食咗無影, 正常酒樓size架!)


仲有其他特價點心~

叫多籠牛肉都係$6.8,
係三粒, 唔係兩粒呀!
有一粒兔寶寶食咗...

俾兔寶寶發現影相添!
唔影喇!

呢餐早茶連一位茶錢同加一都係三十二蚊咋!
貴茶餐廳幾蚊雞, 但坐得舒舒服服...

大少瞓醒又話去飲下午茶...
吓?! 又飲?!
咁去第二間啦!
呢間一樣咁抵食!

散叫點心: 煎釀茄子、叉燒腸、菜苗餃

仲有一籠馬拉糕,
兔寶寶見到就一手搶咗...

熱辣辣都要搣來食,
唔知真係以為佢好鬼肚餓添呀...

下面呢個係午市套餐,
一大碟雪菜火鴨絲炆米加一碟桂花糕,
你估幾錢?!

係廿八蚊呀!
碟米粉大碟到食唔晒要打包!
兔寶寶食咗兩件桂花糕, 其餘兩件又係打包拎走...

呢餐下午茶埋單八十幾蚊!
係咪好抵呢!