七穀芝士健康飽--玩野編

8月25日  星期四   炎熱

早晨呀~~

尋晚整咗D飽飽, 今朝就試食喇~~
今次呢個飽比較痴手難搓,
唔知係咪加咗蛋嘅關係,
亦可能係一早加咗七穀粉,
相對落少咗高筋粉, 所以筋性較低...好彩支"S"棍幫到手,
攪佢一大輪,
就由好痴手嘅麵糰變成不黏手.

跟U can Make嘅食譜,(我做一半份量, 另外加了半茶匙鹽)
可能佢都預咗麵糰係好黏手嘅,
所以都無話要落手搓,
不過因為我要"過手癮",
都搓咗好一會兒.

嘻嘻,
同兔寶寶一樣咁鍾意玩野嘅我又點會滿於跟足食譜搓圓飽飽吖?!
我一路捲, 一路加芝士, 變成"滾輪芝士飽";
將D麵糰當頭髮咁編織變成"辮子飽";
仲有一個山寨版嘅米奇老鼠飽....

除咗"辮子飽"之外, 全部都加咗低脂芝士,
仲唔夠晒健康, 哈哈??

"滾輪芝士飽"的製作過程:


全家幅:

唔洗預熱焗爐, 直接用200度, 焗15分鐘.

出爐喇:

其中一個"滾輪芝士飽"收得唔好, 彈開咗;
有一個"辮子飽", 其中一條散咗出來...
米奇老鼠在最後兩分鐘漏餡了.....

搣開"滾輪芝士飽"":

呢種飽同預期一樣, 並唔係軟熟的,
是非常粗糙的感覺,
由於我是隔咗幾個小時才吃,
無論飽面還是飽心都是煙煙韌韌的,
吃下肚子裡, 是很實在的感覺,
當然啦, 這是粗糧麵飽嘛~~

雖然樣子不佳, 但幾好吃喎~~
什麼牛油, 花生醬也不用搽,
就是吃它簡簡單單的咸味,
還有就是穀物的香.
而且, 吃它一兩個做點心,
並沒有罪惡感.