兔寶寶受難日---抽血+打針

8月30日  星期二  炎熱



尋日大少放假, 呢個假期比平時嘅忙,

早上要返QE同兔寶寶抽血驗甲狀腺功能,

下午就要去診所打乙型流感針同食輪狀疫苗.

一起身第一眼望兔寶寶,

就發現佢打側身响度玩....

飲完奶奶, 梳洗完畢,

兔寶寶今天換上牛仔褲仔呢!!
件衫係9碼架喇,
但都遮掩不住佢個大肚腩.

佢對條牛仔褲好好奇呀,

鏡頭都唔望,
掛住望同攪條牛仔褲.

 兔寶寶:　唔知可唔可以放入口咬呢？！

大少叫我等埋佢起身,

十二點 一齊去QE嘅,

不過反正去抽血都不過係等,
為咗等大少放假可以瞓晏少少,

十一點鐘我就同兔寶寶走咗喇~

今次唔洗等好耐,

不過就要多一個呀姐幫手按住兔寶寶,

(真係想問吓係咪因為BB太大份呀?? )

抽完血, 兔寶寶都好快收聲,

本來諗住慳D唔搭的士,

但太熱真係頂唔順, 好彩都係廿蚊姐...

返屋企飲多次奶奶,

大少起身就去咗"龍朝"飲茶,

到食甜品時先記得影相.

(唔公平呀, 成日都係我幫大少同兔寶寶影.....)

 

飲完茶, 就行去診所打針.
食輪狀疫苗時,個醫生仲話兔寶寶食到嗒嗒聲, 

好似仲想再食咁.

我順便問醫生, 點解我餵BB飲水佢會用舌頭頂返出來,
醫生話BB唔知你俾乜佢食, 本能就會頂返出來...
咁...點解你餵佢食藥佢又曉吞呀???
醫生笑住話: 因為呢D藥好甜嫁, 仲係蜜桃味添!!

佢又鼓勵我繼續埋身餵BB....

打完針出來, 响診所見到一個又係4個月大嘅BB女,
D頭髮好長, 佢父母仲話已經剪過一次呢!
怪不得今日好多人都話兔寶寶似男仔了.
一拍埋去, 兔寶寶好大份呀, 
我仲估人地個B得兩個月....
晚上大少同佢沖涼時都話: 兔寶寶又肥咗了...

打完針返屋企, 食完輪狀BB唔飲得奶住,
我又有時間整咗曲奇餅.
夜少少就去稻香晚飯.
一去到酒樓, 兔寶寶例牌覺覺豬,

俾D時間你食飯.

兩條友叫四個餸, 仲有任食糖水...

 差不多食完, 兔寶寶瞓醒,
大少又要開始一路食, 一路"UN"...

 *********************************************