炎熱週末午餐

5月21日  星期二  晴天

剛剛過去嘅週未我好勤力呀,
除咗焗蛋糕之外,
仲日日都有煮晏晝飯!

星期五, 有西芹炒雞柳.



仲有紫洋蔥炒蛋.
洋蔥, 我愛食煮熟晒嘅, 好甜好好食.
大少就要食生生地帶辣嘅,
佢話下次再煮要留起一半洋蔥兜兩野就俾佢食喎!

呢餐仲煮埋青紅蘿蔔湯飯,
兔寶寶要放埋隻公仔响枱面先肯食...

******************************

週六煮粉麵食, 我同兔寶寶食河粉,
大少碗即食麵無影.

煮多碟菜, 又一餐!

************************

週日食粥, 用冰米煲咗蠔豉皮蛋瘦肉粥.
之前煲粥會一早放皮蛋, 等佢溶緊落D粥度,
我覺得咁先似係煲出來嘅皮蛋瘦肉粥嘛(唔係粥鋪果D蛋還蛋, 肉還肉, 粥還粥)!
次次大少都話我放唔夠皮蛋....
今次同樣落三隻, 但臨尾先放,
大少就好滿意喇, 話好多皮蛋喎~~~

少不了一大碟菜,
屋企煮飯無碟菜總係好似少緊D野咁...

今次大少醒喇,
開餐之前識得响雪櫃攞樽老爺俾嘅醬瓜來送粥!
有佢送粥, 食完一碗又一碗!