杯子杏仁蛋糕(全蛋法)

5月20日  星期一  炎熱

天氣雖然開始熱,
反而增加咗我開爐焗蛋糕嘅興趣,
就係因為天熱無胃口, 食蛋糕頂吓肚好過食飯!

今次摷到包買咗好耐嘅杏仁粉,
本來買嚟係有D野要整的,
但擺吓擺吓又懶吓懶吓咁,
已經唔記得買嚟要整D乜野了.
於是用咗上次整肉鬆沙律卷蛋嘅全蛋法,
加埋杏仁粉, 整咗D杯子蛋糕!

今次好多材料嘅份量都係撞手神架咋,
因為雪櫃較得凍過頭,
一打四隻蛋---竟然全部結成冰!
於是我連麵粉都未量, 就試吓加D糖落去睇吓發唔發得起...
發唔起嘅話, 量麵粉都無用啦!
哈, 呢四隻冰蛋俾我攪吓攪吓,
竟然都發得起喎, 發到寫倒個"8"字架!
臨急臨忙, 水呀油呀呢D材料,
量都費時量喇, 全部用"目測"呢個方法(即係求其倒D落去!)
而杏仁粉呢, 我就扣起D麵粉嘅份量,
補返多D杏仁粉落去,
所有野都係求其是但嘅情況下, 好彩都WORK!

襯記得就寫埋個食譜啦, 俾自己日後做參考.

1. 蛋四隻+ 50克糖(已減糖至不太甜份量)打發至體積漲大兩三倍.
2. 加入約25克水, 再加25克橄欖油.
3. 倒入已過篩的低粉(50克)及杏仁粉(40克), 拌勻.
4. 放入已預熱180度的焗爐, 焗約12至15分鐘.

我懶得分兩盤焗, D杯子蛋糕排到密質質咁,
好彩佢地無發得好高, 唔係就痴埋晒架喇!
一焗起一隻隻漲卜卜, 好靚仔呀!

放涼後就縮咗水, 有D皺紋喇~~~

撕開來睇, 都幾鬆軟架!
食落就同普通海綿蛋糕差不多,
杏仁味就唔係太濃, 下次可以加多些少杏仁粉~~