街外飯兩餐 * 打水豆針

5月24日  星期四  炎熱

星期一大少放假呢日, 兔寶寶下午要去醫務所打水豆針.
打針之前我地先去醫務所附近嘅聯邦酒樓食LUNCH.

一坐低兔寶寶就自動波睇下有乜啱食.

叫咗大少最鍾意嘅蝦餃、蒜蓉蒸鮮魷,
同埋一籠魚湯浸蘿蔔糕俾BB食.



仲有菜苗帶子餃、蒜蓉牛仔骨(好肥呀!),
甜品叫咗芝麻湯圓合桃露.

去打針前兔寶寶心情很好, 同媽咪來個合照.

同Daddy影呀?? 咁就攪筷子好玩些 LU....


大少不甘被我奚落, 捉住兔寶寶另有所圖....

兔寶寶: Daddy你痴咁埋做咩?!

Daddy: 鍚到喇! 錫到喇!!

兔寶寶: Daddy你攪咁多小動作係想錫我咋嘛?!
             我都成日自己走埋去鍚媽咪架喇!!

兔寶寶: 襯人少少我地玩吓轉圈好過啦~

食完野, 去打水豆針.
原來打完之後係會响兩個星期之內在手腳位生一兩粒至十二三粒水豆,
生完呢幾粒身體就會當出過水豆, 以後都唔會再生架喇!
假如兩個星期之內一粒水豆都無出, 咁就要响BB入讀小學前再補打一支針,
總之一定要佢出咗幾粒水豆為止.
所以姑娘都一再詢問我有無再懷孕, 因為兔寶寶生水豆係會間接影響我肚內嘅胎兒(假如有咁計...)
同埋告知我地水豆針同一般針藥唔同, 唔係打响皮膚內層, 只會打响皮膚表層, 所以針口位會有機會腫起少少.

兔寶寶响打完針之後都係循例喊幾聲(叻叻), 拎埋退燒藥就走得LU.
離開醫務所, 我地就走去超市掃貨, 就返屋企執吓野咁.
執完一輪又到食晚飯時間喇! 晚上去咗龍朝酒樓.
呢間算係屋企附近比較經濟而又好食嘅酒樓.
一去到兔寶寶就瞓著咗(唔知係咪打咗針嘅關係呢?! 果晚佢都好好瞓...)

餸菜嚟到, 佢又識擘大眼, 雖然都仲係攤响度,
不過就好留意大人幾時起筷...

過咗八點半, 小菜特價碟碟$38.9,
當然份量細碟D, 但可以叫多兩碟.

叫咗大良炒鮮奶.
呢個上次用正價食過一次, 今次再encoure,
雖然特價咗但水準都可以保持到.

椒絲腐乳炒通菜.

京蔥醬爆駝鳥肉.
呢個好好食呀! 大少話炒得有鑊氣過大排檔添呀!

粟米斑塊.
魚塊炸得比較乾, 係呢碟失手少少...

由於大少好欣賞個京蔥醬爆駝鳥肉.
食到咁上下, 我地決定嗌多個餸,
不過就俾佢個名呃咗: 醬爆蝦乾爽.
上枱時才知道個"爽"字代表豬爽肉,
唯有委屈大少食晒佢喇!!

食飽飽嘅兔寶寶又嗲DADDY帶佢四圍行,
大少唯有帶佢去一角無人行嘅枱仔度企吓.

埋單二佰五十幾蚊, 仲有糖水俾我地揀, 紅豆沙定紫米露?!
咁抵食, 好過去大排檔多多聲啦!