麗香園冰廳 * 仙跡岩

10月14日  星期日  晴天


星期四晚飲宴完畢之後, 呀媽上咗嚟過夜呀!
因為星期五要去QE睇醫生, 從我屋企去好方便!

果朝我地三婆孫去完圖書館之後,
就去咗食早餐.
左諗右諗帶呀媽去邊度食好, 雖然去飲茶就坐得舒服D,
不過佢成日同爸爸飲茶, 就諗第二D野同佢食.

本來想去夏銘記吃魚蛋粉, 去到先知無咁早開,
於是行返入街市果邊,
走入一間老鋪:  麗香園冰廳.

叫了一份早餐C,
包括沙嗲牛通粉 、一份煎得很香的火腿奄列,
還有一個小牛油餐包.
呀媽鍾意飲"茶走", 餐飲就讓了給她,
反正在茶餐廳我只會飲好立克.


這個不是椰堆, 是蛋白糖霜餅.
夠特色了吧?!
街市中的冰廳居然可以抓到這個比馬卡龍更好吃的東西.
上層是蛋白餅, 中層是有不少合桃在內的蛋白蛋糕,
底層是酥皮撻.
廚房轉咗人咋! 以前更加好吃!
時光倒流七十年, 這件如此花心機的點心, 堂食只是賣4蚊!

還叫了一件拿破侖.
 在未轉廚房之前, 我常常走來外賣.
 那時的拿破侖比很多賣十幾廿蚊一塊的連鎖西餅店還要好吃,
雖然現在也不差.
告知呀媽這塊餅堂吃又是四蚊雞,
她瞪大眼睛很驚訝呢!

吃完早餐在街市買埋生果, 又返上樓玩一陣,
到一點鐘先落樓, 諗住慢慢行去QE, 我地約咗13:45呀!
點知唔洗20分鐘就到咗.

睇政府醫院就預咗漫長嘅等待..
等緊嘅時候四圍睇下壁報板嘅資訊啦!
痛風症患者原來除咗唔飲得啤酒同菇類,
仲有好多野都唔食得! 當中仲有雞粉添!
咁即係所有標榜"無味精"嘅食肆都唔去得啦!
唔落味精, 咪落雞粉囉~~

話就話約咗13:45, 不過個醫生差不多14:15先到,
好彩一來到醫院時兔寶寶已經睡著了,
還睡了很久...

個醫生話呀媽膝頭哥痛呢D係老化現象,
無得醫, 只能盡量行少D樓梯去避免加速惡化.
佢又話可以試吓吃一D保健產品例如萄葡糖胺呢D,
雖然成效係因人而異, 但試下無壞.
跟住個醫生又話好彩呢一類型嘅痛症不會持續很久,
通常痛幾天又會無事.
可以做的只是開定D止痛藥必要時吃;
不過佢又提醒這些藥的副作用都幾強,
例如胃部會很不舒服, 一定要等有需要才吃.

見完醫生,
再走過隔離房等照X光, 下次覆診時再"睇片",  這時大少已經來到幫忙到樓下藥房取藥.
不過很攪笑, 下次的覆診日期是一年後的十月份,
為什麼不安排臨覆診前的一兩個禮拜才照呢?
隔咗成年, 張X光片還可靠嗎?!

********************************

睇完醫生,
因為大少趕返工的關係, 响醫院附近食D野就算了.
我地去咗好耐無幫襯嘅仙跡岩吃.

大少要了肉燥米線下午茶, 餐飲要了珍珠奶茶,
這份餐賣$4X.

下午茶餐無幾多選擇,
我同呀媽都散叫. 呀媽要了炸大塊雞拉麵, $36
加多3蚊改成"麥纖麵".

我就要了牛展麵線, 25蚊.
呢碗野一嚟到我打咗個突,
好細碗呀!
點解散叫反而仲細過大少跟餐果碗架?!

攞隻湯匙來比對下,
我無做手腳放隻匙近鏡頭DD,
隻匙同碗麵係同一水平咁影架!

大少還叫多個炸大雞下午茶餐share吃, $3X.
呢D炸大雞就係呀媽叫果碗同一樣嘅野來的.
睇樣都知, 乾爭爭, 唔好食.

呢一份茶餐跟嘅珍珠奶茶俾我飲咗.

散叫一碗麵可以半價叫一杯飲品.
從餐牌中找到"薑母茶"給呀媽喝, 皆因呀媽只喝熱的東西.
呢一壺很抵飲, 半價後只是十三蚊,
呀媽還說薑茶很暖胃, 很滿意呢!

不過呢度D食物就認真麻麻, 三碗麵都係一食就知係味精湯,
仲要擺明就係一包包即食麵跟果D味精包開出嚟做湯. R爆頭都諗唔明點解間野仲有咁多人幫襯...