一嵗生日超迷你生日會

4月17日  星期二  雨天

今日落雨濕濕, 天陰陰咁,
我同兔寶寶都瞓到成點鐘先醒,
而家佢又再瞓過喇!!

兔寶寶星期六生日當天,
哥哥姐姐因為有一連串嘅補習同埋課外活動嘅關係,
改為星期日先慶祝.
大少本來諗住帶D細路去飲茶就算! (又係飲茶!!)
但我覺得D細路仔係唔會鍾意飲茶囉, 佢地好鍾意上嚟屋企玩!
同埋, 星期日飲茶又貴喎!
咁不如我整D簡單嘅食物當係開一個迷你生日會又好,
當係family gathering都好啦, 小朋友鍾意之餘又經濟!


好簡單整咗幾款食物, 除咗個蛋糕同埋甜品之外,
全部都係之前整過晒, 唔怕失手無野食嘛!!

最簡單梗係有小朋友派對必備嘅菠蘿腸,
呢個亦係最快清倉食物.
不過我呢個地獄廚神就連整菠蘿腸都幾乎甩轆,
我烚腸仔時唔記得睇火D腸仔"發"到發水麵包咁, 仲裂埋添!
好彩切開一轆轆之後唔多覺咋!!

紫菜麵包卷, 包住火腿、芝士同埋吞拿魚醬,
整到好似壽司咁, 又係氹細路仔食嘅食物.

薯仔蘋果栗米沙律, 菠蘿腸剩咗兩片菠蘿,
切埋落去. 一大兜沙律, 食剩約一飯碗.

鹵水雞翼、蛋同豆腐. 豆腐係當日先買同加入去鹵,
無咁入味囉!

叉燒醬燒雞: 最後先食嘅關係, 食剩一隻雞脾.

甜品有第一次整嘅紅豆豆漿布甸.
未食之前都擔心唔好食, 好彩D細路好鍾意,
預咗一人一杯, 最後想添食都無呢!!
豆漿布甸係用400ml豆漿加一片5g魚膠片,
呢個魚膠片粉量係啱啱好凝倒D豆漿, 好似食豆腐花咁,
加埋即食紅豆响底, 呢個甜品大少話下次可以再整呀!!

仲有主角芒果慕士蛋糕,
第一次整芒果蛋糕, 難得係個個都話好食,
連唔多"好"芒果嘅大少都讚不絕口, 唔知係咪刷我鞋呢?!
成個蛋糕無得留底, 全部食晒!!

今次迷你生日會預備食物嘅份量啱啱好,
個個都夠飽, 係食剩咗一隻雞脾同一碗沙律咁多.
而且大人細路都食得好開心!
大少問我果日整咁多野食係咪好辛苦?
我話見倒佢地食晒D野, 都不知幾開心!!