再去迪士尼(三)

9月22日   星期六  晴天 

續: 再去迪士尼(二)
等兔寶寶完全平復之後, 我地去咗玩旋轉木馬.



呢個遊戲好啱兔寶寶,
坐親任何交通工具, 佢都要捉實扶手,
就算响地鐵入面已經坐响BB車,
佢依然會搵D柱來扶住, 安全意識很高.
呢架馬車有大大碌柱响正佢面前,
真係啱晒佢!

轉呀轉, 轉呀轉,
兔寶寶會唔會暈"馬"浪架?!
落地測試一下,
企得定唔會頭暈暈, 可以去下一站LU!

我地要响六點前趕去"探險世界"度睇"獅子王慶典"呀!
去到果時已經好多人响度等緊!

大家有無留意大少影相好多時都舉起咗隻手?!
佢唔係想扮自由神像呀!
只係佢攞抽鑰匙出來"叮叮叮"咁引兔寶寶望鏡頭!
但呢個方法唔多work, 兔寶寶係就係望住抽鑰匙,
不過唔係望鏡頭.

好喇! 入得場LU!
呢一套其實係改自"獅子王"嘅歌舞劇,
因為係四面台嘅關係, 坐邊都睇到!

等緊睇劇嘅兩父女很興奮.

等得無聊,
兔寶寶响大少對腳度玩"sir"滑梯.

開始喇! 歌舞昇平, 都幾好睇,
黑人歌手仲唱得好好聽.

仲有舞蹈員吊"Y吔"在空中跳舞,
以及大隻佬表演轉火把.
兔寶寶睇到眼都唔眨.

*****************

欣賞完歌舞劇, 天已經黑了.
我地等緊木筏前往泰山樹屋之時,
兔寶寶忍不住疲累, 在大少嘅懷抱下再次瞓著咗!
好似一隻小樹熊咁~

不過登上木筏之後,
兔寶寶又識得擘大對眼...

咁我地先可以來一張合照咋!

木筏好快就橫渡咗條"探險河",
行上一條長長嘅樓梯之後, 就來到樹屋.

呢個環節主要都係俾人影相.

之後我地再用fastpass玩多次維尼熊蜜糖罐.
玩完呢次之後, 人地都收工了.

行程尾聲, 我地等睇煙花,
見到小飛象, 兔寶寶最鍾意大笨象架喇,
走埋去影相先!

再一次多謝工作人員幫我地影合照.

寫咗咁耐都唔記得講,
今期迪士尼嘅主題, 係萬聖節呀.
日頭都唔多覺, 一入夜, 萬聖節嘅佈置就好明顯.

呢個南瓜鋼琴好得意, 連坐椅都是南瓜來的.

唐老鴨同高飛都變咗南瓜.

奇怪?! 兔寶寶唔驚南瓜版高飛嘅?!

仲有南瓜版米奇同米妮.


今次我地無逼埋去睡公主城堡度睇煙花,
因為大少話離遠D睇無咁逼, 仲睇得清楚D喎!不過咁遠睇, 矮D嘅煙花就睇唔倒喇~

其實兩個大人都無乜點睇煙花,
因為大家都花了不少精神來捕捉煙花影相.
反而係兔寶寶對煙花很好奇,
很投入觀看.

放完煙花, 離遠响睡公主城堡影相.

再來一張合照!
原本很美好的一張相,
兔寶寶你係食緊手指定撩緊鼻哥?!

臨尾再响大門同米奇老鼠花圃影相,
才依依不捨地離去.
一邊行一邊同大少商議,
等兔寶寶上幼稚園時要再來呀!

我地又搭返東涌線列車離去.
兔寶寶面色有點不滿啵?!
究竟乜野事呢?!

原來無野俾佢扶住, 好無安全感!
兩隻手都扶實就放心晒!

******************

返到屋企附近,
再去返上次食雞煲果間酒樓,
打埋邊爐先返屋企!

三篇迪士尼之旅網誌完結.
多謝大家不介意我又長又冗呀~