稻香大斑兩味

2012年7月18日  星期三  炎熱

續:  意粉屋下午茶 * 食生菜唔易架!!

食完意粉屋, 我地齊齊返屋企瞓晏覺.
瞓醒就再出去食晚飯,
全日唔係食就係瞓, 爽呀!!

果晚去咗賣好"痕"廣告嘅稻香88蚊孖寶.
基本上枱枱都叫架喇!
我地去果間無做白灼蝦+雲吞雞,
而係大斑兩味.

大斑一味: 炒斑球

第二味: 炆頭腩

都好多肉架!
不過同一日同一個時間,
呀公呀婆响屯門果間稻香食,
就話個炆頭腩好多骨...
所以多唔多肉, 真係睇你好無彩.

再加碟腐乳炒通菜.

叫多一個白飯, 兩位嘅自助甜品/飲品,
埋單多謝$19X.


****************************

兔寶寶升咗"呢",
唔再單單攞住個電話講,
用BB櫈條安全帶個扣扮藍芽,
真係俾佢吹到"啤"一聲...

究竟佢係同邊個傾電話傾到入晒神呢?!

兔寶寶: 少女情懷總是"C",
             唔講你知等你心思思, 哈哈!

**************************
自從上次响美麗華MONCHHIICHI店放手自己行過一次之後,
兔寶寶又好似失咗憶咁, 唔記得自己識行路,
一定要拖住先肯行...

食完飯, 大少打個眼色俾我, 一齊放手, 睇下佢點...
一如所料, 佢又係定咗格唔郁,
係有時拍下手掌等氣氛無咁尷尬...真叻女!

攞盒朱古力引下佢睇下點?!

伸長隻手攞囉!

對峙咗十分鐘,
大少同我都覺得: 我地好似釣魚呀!