婚假的第一天

6月24日  星期日  晴


補記: 婚假的第一天(19/6/2012)
果日訓醒已經點幾兩點,
我地先去銀行做咗D正經野先,
攪掂晒已經三點幾四點,
我連早餐都未食, 於是去家鄉雞食D野先....
叫咗兩個下午茶餐, 每份都有一隻雞鎚 + 炸雞粒 + 萄撻仲有汽水,
都係廿蚊有找.


大少讓埋佢個萄撻俾我食, 但都係唔夠飽, 加多8蚊換半份什麼芝士雞薄餅,
熱辣辣係幾好食嘅,
不過真係好細塊, 都唔夠攝牙罅...

之後打算响九龍公園求其搵撻地方打下羽毛球,
點知大少又話曬又話熱, 就走去行商場...早知就唔帶球拍唔著波鞋啦!

晚上去咗港晶Neway唱K兼食buffet...

今次有好薄嘅pizza, 無論餅底同層芝士都好薄,
仲薄過餅乾, 薄到我食咗五塊一D都唔覺得漏...
兩隻豬脾仔係夾俾大少架...

呢碟有有薯皮、田螺薯蓉、青豆齋鮑片, 再加一塊pizza.

排隊攞嘅豬手, 唔好睇好似好大份,
實質層皮好厚, 好少肉咋!
不過大少都攞咗兩次.

蒸象拔蚌仔, 成日出...唔洗爭都有得食.

冷盤有日式八爪魚仔、螺肉及通粉沙律等..

排隊攞嘅生蠔, 每人每次攞兩隻.
不過其實無乜人攞, 呢個規矩係唔想D人一次過掃晒其他人無得食姐!
想食多兩隻就要行多一次. 

仲有其他野食, 無影相...

兔寶寶都唔客氣, 飲飲食食自己招呼自己..

*******************************************

十一點幾埋單, 大少飛的趕住返屋企樓下涼茶鋪食龜苓膏.
飲咗一排"單眼佬"嘅涼茶, 大少話佢D涼茶無乜料到,
暗瘡照樣狂生, 似乎以前飲屋企樓下果檔嘅涼茶仲好.

呢段時間, 大少日日都要食一碗大龜苓膏,
好彩佢係買二送一, 我多口問老細三碗可唔可以分三日嚟食,
個老細又肯啵.... 咁條數又慳好多!!

食龜苓膏期間兔寶寶已經唔理我地, 掛住同周公傾計去喇!

P. S.  我的婚禮晚飯篇已經post咗喇,
          由於私人相較多, 請大家登入後收看啦!