呢排我D失眠症又發作, 變相多咗時間用.
兔寶寶瞓咗之後, 我就得閒打blog喇!
話說, 我天生就有荷爾蒙失調嘅毛病.
由我青春期開始, 呀媽就帶我睇中西醫, 又打荷爾蒙針咁...
無論食咩藥, 我經期係比一般人少嘅.
年紀輕嘅我, 唔覺得有咩大不了,
仲好開心添!
因為唔洗阻住我游水....
讀大一果年, 就係因為貪玩, 掛住游水, 停M停咗差不多一年都無睇醫生.
當時邊度會諗生兒肓女嘅問題吖!
本身有荷爾蒙失調已經比較難受孕,
而停M停咗差不多一年, 受孕機會就更低.
因此, 我一路都估唔到自己會有BB....
講出嚟大家都會驚訝, 我係响12週先至發現自己有BB嘅,
而且, 同一般人唔同, 我無咩懷孕徵兆,
只係覺得胸部怪怪咁, 我仲懷疑自己有乳癌!
跟住我仲同大少好認真咁講, 我可能有乳癌呀...
大少就問我, 你會唔會係有咗---谷奶呀?!
當時我心諗, 都痴痴地嘅, 仔都未有一個, 谷咩奶呀?!
(到上母乳餵哺班時, 我才知道, 原來乳房响有BB嘅一刻, 已經開始準備製造母乳了...
大少亂UP都UP中)
我又無咩特別頭暈身熱作嘔作悶呢D嘅野....
只係聽完大少咁講, 我個心就唔知點咁.
因為我慣咗臨瞓前都會做sit-up, 果日聽完都唔敢做..
為求安心, 第二日即刻去買驗孕棒...
結果當然係.....Bingo啦!
佢就係兔寶寶了....
跟住照Ultra-sound, 先知道BB有幾多週,
再回想返, 未知有BB前嘅12週, 基本上好多大肚唔可以做嘅都做齊!
當時每星期都會同大少去食一次放題, 魚生呢D走唔甩;
隔星期就返一次大陸揼骨, 仲要係揼泰式果隻!
每次D技師問我, 要唔要按個肚呀?
我都慌死蝕底話按埋!
仲有, 次次返上去都會食半生嘅師奄!
果時我返果份工有時要見客, 因為又有notebook又有projector果D野要攞,
我好多時都會拖住個行李箱, 仲要著住high heels,
有一次仲唔小心拗柴而要去睇鐵打...而我仲未知兔寶寶已經响我個肚入面!!
不過咁, 註定兔寶寶係一個幸運兒,
計返日子, 我同大少係响懷有佢之前嘅一個月,
正式戒除煙酒生活;
以前我飲酒飲得好癲,
特別係近呢幾年, 癲到去一個都幾離譜嘅地步;
真係好好彩, 如果我從來無戒酒,
以我咁飲法, BB留唔住不突止,
我諗我都命不久已...
我覺得兔寶寶真係上天送俾我嘅守護神,
要我心甘命抵咁戒除一切惡習;
呢個小天使救咗我一命之餘,
仲為我寫下人生新嘅一頁呢!
沒有留言:
張貼留言