家庭日

10月17日  星期三  晴天

兔寶寶: HELLO! 大家好!
            又係我地放假D相呀!

(此為"吉"罐...)

星期一大少放假呢日, 中午我地出咗去銅鑼灣,
同兔寶寶一齊影佢嵗半嘅寫真!
唔係影戶外呀! 呢幅係自己影架!
要下個星期先可以睇相!

影咗差不多個幾鐘頭相之後, 就响附近搵野食!
我地去咗沙嗲王呀!
我就叫咗一個雞扒沙嗲湯拉麵~

大少就要一份印度薄餅餐.

叫少少野食就算喇, 因為18:30就會去打邊爐呀!
跟餐可以叫一杯17蚊嘅飲品, over17蚊就補差價,
咁大少就加5蚊要咗杯椰汁仙草,
我就加6蚊要咗杯香芋珍珠.
沙嗲王D野係幾好食嘅, 又唔係貴,
怪得可以做咁多年啦!

食完呢餐, 大少陪我去宜家買爆谷食,
途中經過商場外有Kinda繽粉樂做緊萬聖節嘅promotion,
抱埋D睇下兔寶寶驚唔驚"朦面人"先!
呵呵~ 佢縮呀!      (這個呀媽真是有點變態...)



買完爆谷, 我地去咗行維園.
草地有開放喎!

咁就可以俾兔寶寶盡情奔, 盡情跳,
盡情放電...

就响兔寶寶自己玩緊嘅時候, 有個鬼仔出現,
時而拉高件衫, 時而表演青蛙跳...
原來...係想嚇吓兔寶寶~~~

兔寶寶又點會咁易俾佢嚇窒吖!
鬼仔無癮地離開後, 又有一小女孩出現.
見佢行為舉止極似大人, 仲以為佢都好大個添!
原來佢只係就快兩嵗咋!
你睇, 當兔寶寶仲係傻吓傻吓唔知發生咩事嘅時候,
佢已經識得擺晒"普士", 企定定咁望鏡頭喇!

可能大家LEVEL唔同,
呢個妹妹仔好快覺得同兔寶寶唔啱KEY,
想話行快兩步撇甩我B....
不過唔好意思呀,
我家兔寶寶以為你同佢玩"捉E因",
你去邊佢跟到去邊...



好彩, 呢個時候兔寶寶發現另一班小朋友,
好快埋咗另一堆唔再C纏爛打.

就响我忙於照顧兔寶寶嘅同時,
另一邊廂嘅大少, 正在做緊D犯法嘅野...
餵伺公園內嘅禽鳥, 唔該$1500吖!

一場嚟到, 梗要影返D大合照啦~

之後我地離開大草地, 去遊樂場玩.
九龍區好少有BB鞦韆, 見到就一定要排隊玩喇!

************************

早前見我地食開嘅雞煲火鍋店又攪團購,
買咗兩張飛.
晚上我地就去咗食任食火鍋,
$198兩位全包架喇!
今次唔係雞煲, 係雜菌花甲煲.

食到咁上下愈坐愈凍,
於是兔寶寶變身成為解放軍...

******************

嚟緊呢三日我地會走入長沙宿營呀!
星期五晚再見!