2012年2月11日

2月12日  星期日  寒冷

上星期我問大少: 「你知唔知2月14号除咗係情人節之外, 仲係乜野日子呀?」
大少: 「唔知啵! 係乜野日子呀?」
我: 「係兔寶寶10個月生日呀!!」


大少早幾日同我講, 話今日要一早同兔寶寶哥哥姐姐去學校旅行,
叫我尋日唔好咁早叫醒佢, 俾佢瞓多D,
因為尋晚仲要開通宵, 無得瞓...
咁尋日我起身嘅時候就關埋房門, 費事兔寶寶嘈醒佢啦!!
响廚房煮緊粥嘅時候, 大少走入嚟,
問: 「老婆仔呀, 你知唔知今日係乜野日子呀?!」
「乜野日子呀?! 」我一臉茫然.
出去望下個月曆...大鑊!!
係大少正日生日呀!!! 我竟然完全無咗件事!!
大少見我反應, 知我真係唔記得,
而唔係扮唔記得玩surprise,
佢好嬲呀!
酸溜溜咁話: 「情人節你記得, 兔寶寶10個月生日你記得, 係我生日你唔記得!!」
之後走入房, 「呯!!」一聲關上門,
見我唔闖入去, 5秒鐘之後仲上埋鎖...
(不過佢知道條房鑰匙係擺响廳囉!)


哎呀!
怪不得佢成朝醒咁多次出出入入去廁所啦!
我仲諗攪乜咁多廁所去嘅?!
原來係想睇下我有無表示!
咁之後我梗係亡羊補牢啦!!
佢又唔玩Facebook, MSN果D喎!
無通知無提示,
一時唔記得喳嘛!
大少就好似個細路仔咁, 話佢都唔會記得我生日喎!
傻啦大少, 我點會好似你咁收收埋埋,
到時候我實會一早大鑼大鼓咁通知你架!
而且大少咁大方, 點會嬲咁耐姐, 呵?!