11個月大 * 去吃西安菜

3月14日  星期三  寒冷

大家識唔識讀呢個字呀??



今日係兔寶寶11個月大生日,
仲有一個月, 就一嵗了!!

尋晚我地三個都好夜瞓,
今日瞓到黃朝百晏先起床,
趕頭趕命之下就去咗屋企附近嘅小店食西安野,
間鋪叫有緣小敘, 飲食男女同蔡SAN都介紹過架!!


去之前已經知呢間野好似話係香港唯一嘅西安菜,
有D特色野例如驢肉、biang biang麵賣.
(biang: 音"餅")
我叫咗乳香雞翼biang biang麵,
有大中小辣你揀, 我要唔辣.

我咁細食, 食一條麵就夠架喇!!
呵呵, 無錯呀, biang biang麵, 係一碗得一條架咋!!
你睇下條麵幾長!

有D似厚身嘅雲吞皮, 食落煙煙UN UN咁,
撈埋佢D香料芽菜一齊食, 都幾好味架!!

乳香雞翼熱辣辣, 不過好似醃得唔夠入味咁...

大少叫咗招牌麵, 不自量"辣"咁一叫就叫中辣...

食咗兩啖之後, 即刻叫咗罐可樂飲~
之後仲要人地倒咗D辣湯,
換過D清湯俾佢.
食呢碗麵, 前後飲咗兩罐可樂加兩杯清水,
不過佢話辣得嚟都好味呀!

眼闊肚窄叫埋呢個土豆肉饃,
即係一個煎包夾住一D炒薯絲同肉絲.

食呢個嘅時候我已經食飽了,
特別就特別但唔係話好好食囉!
我覺得多返D肉餡會好食D, 不竟薯仔又係澱粉質,
麵包夾住咁多澱粉質好似無餡咁...

甜品有金莎炸湯丸,
都幾好食架!!

食咁多野埋單百一蚊,
計埋環境就唔係好抵,
不過耐不耐食吓呢D特色野都幾過癮嘅!