兒童樂園

11月8日 星期五  晴天

星期三大少放假, 我地去咗太古城玩.

先上樓上food court醫肚.

去到發現差二十分鐘就有下午茶, 

每個餐都會平十幾廿蚊, 咁就等多陣先食啦~

早餐只係飲咗杯咖啡, 飢腸轆轆,

就到隔離麵包鋪買個包食住先,

兔寶寶又跟住走入來, 要我買熊貓包俾佢~

咬完個包去吓洗手間, 

大少仲利用呢少少時間買咗兩件特價衫添~

就行返入food court買D野食喇.

我嘅炸餃子拉麵和大少的韓國辣雞粉絲.

 各有各買食物就睇得出大家對兔寶寶幾有心啦~

大少吃的辣粉C和凍咖啡都是兒童不宜的, 

只有媽咪會考慮啱唔啱小朋友食,

所以呢, 哼~ 世上只有媽媽好~

食完野, 就走去今次來太古城嘅主要目的地,

就係冒險樂園嘅波波池喇~

細個都有玩波波池, 果時好似好普及, 

記得以前有D小鋪頭就是專做波波池生意的, 

幾蚊玩一次, 玩完仲有貼紙送.

不過宜家D租咁貴, 齋做波波池真係食風都得喇...

未去到波波池範圍, 兔寶寶就被叮噹吸引住了.

我知, 宜家叫多啦A夢吖嘛!

不過作為七十後, 都係叫叮噹親切D~

原來波波池係响一個兒童樂園入面, 

一個小朋友+ 一個大人入場費係50個代幣.

如果想兩個大人一齊入去玩, 就要多收廿個代幣.

因為無乜人玩, 店員俾我地兩個大人輪流入去陪兔寶寶玩.

因為著住婆仔鞋無著襪, 

仲花了10蚊買了對船襪先可入場.

唔好睇條滑梯咁短, 實質都好跣滑得好快.

未開始玩時就目擊一個同兔寶寶差不多大嘅小朋友獨自sir梯時整親大哭.

所以我地都抱住兔寶寶來sir.

呀B都想試架, 有晒功架, 最後都係唔夠膽.

不過我同大少都覺得sir落嚟果下會俾D波波"銀"到幾痛架~

 因為條滑梯夠快, 而兔寶寶又有人抱住, 

只享受其速度感, 不用分擔八月十五之痛.

所以佢就不斷要求sir梯, 

玩波波池反而淪為後選.

自知面皮及籮柚皮都不及大少厚, 

所以我只係入咗去陪兔寶寶玩一陣咋!

其實去太古城仲有一個目的嘅, 

係想去AEON百貨店搵吓有無鬆弛熊魚蛋賣...

於是就襯兩父女玩梗時走去八吓,

果然如網上所講係長期缺貨嘅, 

豬仔魚蛋唔吸引, 無買.

 

講返果個兒童樂園, 

除咗波波池同sir梯之外("sir梯"係新詞, 大家可以在兔寶寶詞典中找), 

仲有好多野玩, 

對比起其他機動遊戲動輒要五、六個代幣玩一次(仲要係玩一分鐘都唔夠!),

呢個區域50蚊玩足一日, 抵到爛.

 

 

 

 

離開前玩埋保齡球同射籃, 

大人同小朋友身心都滿足健康.

最後當然唔少得兔寶寶小姐嘅指定動作...累極而睡啦~

Bye Bye~~~~