行工展會

1月5日  星期六  寒冷

一月七日就工展會完架喇, 本來以為今次無機會得去添,
大少知我想去, 於是星期四呢日就攞咗假,
同我地去行吓.



未入場前先同Daddy、媽咪分別影吓相...

一入到去就後悔極了!
嚟之前我地响一間酒家仔食LUNCH---其實根本係唔需要的!
場內有大把野食! 仲有唔少係幾有特色架添!
連Parma ham同龍蝦都有!



唔捨得食D咁貴嘅野, 整碗大眼雞魚蛋食吓...
唔...奶奶自己打嘅魚蛋好食好多喎!

呢條飲食街零舍多人嘅...
一路行一路食呀飲呀!
大少就話我, 你又咖啡呀、豆漿呀、湯呀、蜜糖水呀呢樣果樣,
唔怕攪肚咩?!
無得飲無得食我就會肚痛!

想話幫兔寶寶影張相,
點知佢一見相機就蹲底,
之後仲閃埋添...

好多即場食嘅野我地都忍住唔食,
因為晏D book咗枱去食自助餐呀!
不過最後我地都係忍唔住買咗杯乳酪雪糕食...
兔寶寶唔肯用隻匙"畢"來吃,
要成杯拎住食...
我梗係唔俾啦, 食到成件衫都係,
等我地食晒D雪糕俾個筒你拎住就得!

係呀, 大少手痕從BB車抱咗兔寶寶出嚟,
之後全程呀B就唔再肯坐返落車喇!
梗係啦, 有人抱高D先睇得更多野架嘛!
大少, 一人做事一人當,
你抱晒佢呀!

走馬看花咁行完工展會,
我地去咗黃埔花園入面隻大船果度去拎D野...
等大少果時兔寶寶又極不情願地被影了...

雖然只係行咗兩三個鐘,
我地都買咗好多野架!
架BB車後尾就用來裝貨物了.

以食物為主, 餅乾魷魚絲等等零食...
最抵係湯包, 百一蚊有六包;
海味都好抵, 一百蚊有齊猴頭菇、冬菇同螺片;
又買咗半斤蠔豉, 都係四十幾蚊.
另外仲有電飯煲、同兔寶寶D底衫褲、原子筆.

呢包孜然粉係大少叫我買嘅,
佢話要來醃羊肉食喎~

呢隻干貝醬用來送飯都幾好食,
一買買咗四瓶.