星期四晏晝, 呀媽約咗五姨同舅父過嚟我地果頭飲茶呀!
已經識行嘅兔寶寶,
响無其他引誘時, 係唔洗旨意佢會同你行一步的;
只會企定定, 敵不動, 我不動...
五姨都係住屯門架! 由細睇到我地大,
所以我同佢都較熟,
而且佢好隨和, 成日都笑容滿面咁,
難怪兔寶寶都幾"痴"佢!
五姨帶咗一袋玩具來,
仲洗乾淨, 入埋膠袋以防整污糟...
兔寶寶好鍾意隻小路寶呀!
我地都叫咗好多野食, 不過就無全部影相喇!
每逢埋枱食飯, 我地都要處於戒備狀態,
以防有人攪事!
飲完茶, 舅父先行返屋企(都要多謝舅父特登出來飲茶呀!),
我地就去九龍公園玩.
就係呢度, 我地發現兔寶寶好鍾意行樓梯呀!
三個靚女影返張相先啦!
去到遊樂場, 有一件都幾不幸嘅事發生咗,
有一個小男孩响條滑梯嘅樓梯跌穿頭, 流到成身都係血
, 由父母陪著等白車.
所以去遊樂場真係要時刻提醒小朋友唔好跑太快,
以防自己跌倒又或者撞親人, D無情力真係可以好利害!
今日有咁多人睇實兔寶寶,
咁就唔怕有人撞佢, 係怕佢自己"中"落D柱度姐!
兔寶寶行樓梯行上癮, 不斷要行D爬架嘅樓梯,
真係辛苦晒呀媽同五姨!
好鍾意呢張相, 三位靚女每人坐响一條滑梯,
好自然呀! 不過都係呀媽笑得最開心!
呢個時候兔寶寶已經玩到成頭大汗,
要响背脊"攝"條毛巾仔以防冷親!
直到天色開始陰, 又好似想落雨咁,
大家先捨得走呀!
沒有留言:
張貼留言