難吃的(屯門)裕滿人家 * 英格蘭手信

8月21日  星期二  晴天

尋日又入咗珀麗灣睇相同揀相,
相片影得比我預期中好喎!
起初我仲擔心個妝會太濃添!
好彩影咗出來都仲認得係自己.

事前我已經同大少講, 我係絕不會加錢再買任何相的.
作為一個消費者來說, 我係比大少理智的,
亦能恨心地把相片捨棄, 反而大少有點不捨得呢!
揀咗唔夠一個鐘頭相,  就完成任務了.

做完正經野, 搭返shuttle bus 出葵芳,
就轉巴士入屯門去搵公公婆婆.
今次係大少同兔寶寶第一次坐巴士入屯門呢!

商量咗好耐去邊度食, 最後決定試吓卓爾居入面嘅裕滿人家,
因為呀公想試吓果度標榜係招牌菜嘅文昌雞.


無野玩, 玩手指.

叫咗一個$26X嘅三寶套餐.
包括冬瓜盅.

呢個味道正正常常吖!

片皮鴨兩吃: 其中一味....

其實我地唔太鍾意食鴨皮,
後尾都無食晒呀!

兔寶寶: 你地唔食就等我嚟啦!

第二味: 揀咗涼瓜炆鴨殼


三寶套餐第三味: 日式鹽燒倉魚.
好大呀! 隻碟!

兔寶寶: 呀婆餵我食魚魚, 寧舍好味!

大少提議叫的燒羊架, $9x三件.

我不吃羊唔知好無食,
但呀公話燒得不錯喎!

蒜蓉炒菜心.

十分把鬼的文昌雞, 一隻$19X.

我又不太吃鴨又不吃羊
(不是不想吃, 但我是一點騷味都受不了的人),
魚肉又要留多點俾兔寶寶,
所以十分期待吃文昌雞.
不是新鮮雞都算了, 一點味道都沒有,
總之就是把一隻冰鮮雞解凍蒸熟,
是我一生中吃過最難吃的雞,
連稻香一蚊雞都好食過佢!
想話點D薑蔥蓉食吓,
連碟薑蓉都可以整到唔好食的,
難度之高, 怪不得成為招牌菜!
不由得諗起<國產凌凌漆>入面一段對話:
凌凌漆：夥計。
夥計：系。
凌凌漆：你哋呢度啲豆腐花又話最出名嘅。
夥計：系啊。
凌凌漆：臭架喎。
夥計：出名臭吖嘛。
凌凌漆：噉唔該可唔可以攞啲出名好食嘅過我呢？
服務員：都系豆腐花囉。
凌凌漆：唔系啩？
服務員：系呀，你當佢臭豆腐噉食，觀感就會fit曬。
凌凌漆（兩人對笑）：噉畀多個炸嘅我吖。

"

兔寶寶: 炸咗隻雞佢食會唔會好食D呢呵, 呀公?!

最後送上糖水西米涼粉撈.
這餐埋單$78X.

舅父去完英格蘭回來, 仲帶咗手信俾我地一家三口呀!

給我的是有機意粉薄餅醬,
瓶上分別印了一個父親、一個母親和一個幼兒,
代表我們一家三口, 很有心思呀!

最矮的一瓶是我常在鬼佬食譜中見到的果仁醬,
可以試吓整呢!

給大少買的是一件印有倫敦版圖的t-shirt,
質地很不錯呢!

給兔寶寶的Peter Rabbit,
舅父話買藍色是因為這隻拿著紅蘿蔔,
比較得意呢! 兔寶寶也很喜愛啊!

還有一件hand-made的有機香皂,
我不會捨得用了, 放在衣櫃裡讓它散發香味吧!
多謝舅父!

******************************

搭西鐵回家時, 兔寶寶發現了這個小童度高尺.

兔寶寶: 媽咪, 我掂到把尺喇, 幫我買張飛啦!

媽咪: 要個頭殼頂掂到把呎先計架!
          你仲差成大半呎先要買飛呢!
         

兔寶寶: 咁我知喇,
             我蹲低咪有排都唔洗買飛囉?!
             媽咪你都快D蹲低啦!