放假一天

5月31日  星期五  炎熱

星期三大少放假,
前一晚我失眠(因為之前瞓得太多了),
五點幾打算瞓時兔寶寶俾蚊咬到醒咗(開住冷氣都有蚊!),
到九點先至瞓返.
而我十點鐘約咗做BODY CHECK...
結果...我成晚都無瞓過!
做完檢查返屋企已經十二點,
叫醒大少落街飲茶!

兔寶寶俾隻衰蚊咬到對腳花晒,
可能好痕啦, 佢出門口時唔肯著鞋著襪!


响酒家仔度食,
呢個蠔餅飯, 只係廿八蚊!
其他炒野都好靚架!

大大碟豆豉鯪魚油麥菜, 又係廿八!

兔寶寶食菜 + 白飯都好滋味!


叫多籠馬拉糕俾BB,
埋單一百有找!

食完飯, 無無聊,
搭地鐵去中環行吓.
我用由中環站行去香港站嘅扶手電梯,
而兔寶寶就行平路追我, 咁都玩得好開心.
行到去迪迪尼售票處, 離遠呀B就見到兩隻"mouse"添!

响IFC行咗陣,
呢個商場對我地來講都無乜好行, 係行吓CITY SUPER咁囉,
就慢慢行過上環.
夜晚瞓得唔多好嘅兔寶寶就瞓咗喇~

我地係諗住去行上環間先施架!
點知條扶手電梯太窄, 部BB車過唔到.
搭LIFT呢, 每層都有條咁嘅棍阻住晒,
要出LIFT就要事先通知樓下接待處搵人上來開鎖.

碌棍係層層都有架!
非常之baby-unfriendly.
佢地都有BB部架, 真係搵鬼去囉~
兔寶寶唔係瞓咗都話可以抱起BB摺起架車姐,
佢瞓咗一抱佢實醒,
唔想搗亂佢午睡時間, 到食晚飯先來瞓.
要層層call人左等右等真係好麻煩,
結果我地行完一層就走咗, 去行隔離永安!

臨走前問吓接待處D員工點解有D咁低能嘅做法,
佢地話唔關先施事,
係隔離嘅租客南豐唔想D送貨嘅用客LIFT,
先會整碌棍响度...
聽完佢咁講我更加R爆頭,
點解唔簡單D貼咗紙指引搬運員用貨LIFT?!