放假一天

7月4日  星期三  晴天


你兩父女攪乜?


剛過去嘅星期一, 又係大少例假,
我地又係咁無所事事...
LUNCH果餐大少又話去飲茶...
又係飲茶?! 不如食下其他野啦!
前一日無意响openrice睇到屋企果區有一間餐廳,
食牛扒豬扒雞扒呢D野, 竟然有芝士汁供應.
於是我地就行咗幾條街去搵呢間餐廳了.

其實都唔難搵吖! 就响太平館對面咋嘛!
呢間食肆叫"金加利餐廳", 其實睇佢格局同價錢,
說是茶餐廳會比較恰當D.
時值下午茶時間, 大少就要咗個牛扒沙律下午茶餐.

呢個下午茶餐跟埋飲品, 廿八蚊咋!

我一心係為個芝士汁而來, 見下午茶餐雖然抵食但無芝士汁,
於是都係叫返自選扒類午餐.

餐湯, 我要白湯,
好睇唔好飲.

由於要俾D飯兔寶寶食,
所以我少有咁唔要薯菜要白飯,
我嘅牛扒飯跟芝士汁.

好可惜佢個芝士汁只係得個樣ONLY,
雖然幾好食但係無芝士味的,
不過咁, 38蚊一個餐, 我仲可以要求什麼呢?
而且佢塊牛扒雖然薄但都幾好食又大塊,
有機會可以再去食吓嘅...


兔寶寶, 個場唔係你玩晒架!

之後我地行咗去美麗華商場, 又見到"電視框",
咁就影吓相先! (感謝好心行過的靚仔哥哥主動提出幫我們影相)

兔寶寶你手指指, 指乜野呀?

我同大少拍拖果時好鍾意去呢間monchhichi專門店,
我以前都有儲佢D公仔! 不過而家有咗兔寶寶,
呢D錢又慳返了, 所以只睇唔買.

就係响呢間鋪頭, 兔寶寶踏出佢人生第一步!
佢要行前睇公仔!
咁啱鋪頭老闆娘响度, 佢好好人,
仲叫我搵電話影低呢一刻.
其實我想架! 不過佢鋪頭太好生意,
我真係唔好意思响入面影相阻住佢囉...

至攪笑係兔寶寶行咗兩步之後竟然自己拍手!
係咪自己讚自己呀?! 攪到呀老闆娘同個店員都不好意思唔跟住拍手!
當然我同大少都有拍埋一份啦!
其實個場面係好溫馨的!
所以我都忍不住行出去出面拍咗前日post果段video!


自己識行後, 而家兔寶寶信心大咗,
拖住大少一隻手都行得隱陣咗了...
你睇佢個樣, 幾得戚!

咁招積, 等媽咪整蠱吓你先得...

http://www.youtube.com/watch?v=psH7Y0rCbdk&feature=player_detailpage