母親節晚餐

5月15日 星期三  晴天

續: 母親節TEA @ 屯門曼谷泰菜

母親節呢日我同兔寶寶就入咗屯門慶祝,
咁大少有乜野表示呢?
答案係乜都無!
果朝佢仲臨時通知我約咗D小朋友出來玩,
因為有人母親唔得閒湊細路!
好地地嘅母親節變咗父親節,
真係諗起都有D嬲嬲地呀!

由屯門搭車返到灣仔已經接近晚餐時間,
都有諗過求其搵間茶餐廳同兔寶寶食D野就算.
見到茶記都係一家大細咁,
頓時覺得兩母女走入去好似好慘咁...
於是返屋企煮D小米粥俾兔寶寶,
而我就因為前一天失眠,
食麵包算了, 打算早D上床休息.

原來大少無忘記我----呢個呀四呢!
晚上九點佢打返來問屋企D剩餘物資食晒未,
可唔可以煮個麵佢吃....
唔通我話唔得咩?! 屋企又確係有野食.
蒜蓉蒸頭腩, 係大少打邊爐D剩餘物資,
放咗幾日, 本來打算丟掉架喇!


屋企有D雞脾肉, 撕開佢再加包即食海哲,
又一碟.

再烚多一碟仔菜,
呢餐係為大少而設嘅!
食完飯大少拍拍個PAT PAT走人,
唔洗旨意佢會幫手洗碗!

******************

同場加映, 大少某兩晚嘅宵夜:
韮菜花炒煙鴨胸.
見韮菜花七蚊有兩扎, 大少又鍾意食,
忍唔住買咗.
打俾大少叫佢宵夜返屋企食烚韮菜花,
佢話一定要有D肉先吃...

另一晚, 大少主動話要食烚丸丸,
各種丸類說明要吃幾多粒.
煮好出來佢叫我幫手食.......下面果幾條菜,
因為有好多, 食唔晒咁話!