德成號蛋卷

5月6日  星期一 

話說四月某天,
同大少經過北角呢間幾出名嘅德成號,
門面都幾大架,
獨沽一味只賣蛋卷!
想話買返罐試吓,
店員竟然話要訂嘅話要八月先有得拎,
否則就要朝頭早八點零鐘排定隊等九點開門買,
而且每人每次只限購四磅(蛋卷分兩磅裝同一磅裝),
大約九點幾就賣晒架喇.
有無咁誇張呀?!
問吓奶奶, 佢話真係咁誇!
一朝早買蛋卷嘅人龍就水蛇春咁長,
所以佢住响附近都無買過來食.


早排同呀哥講開,
我話想買來試吓,
再唔係買來送俾人都好有心思.

前兩個星期六, 我地响屋企食緊午飯時,
突然有人拍門,
原來呀哥晨咁早特登由屯門去北角買蛋卷俾我!
真係好感動呀!
唔捨得食添!
不過唔得喎!
D蛋卷無防腐劑, 唔食就變壞架喇!


兩種味道, 一樣一罐.



呢罐家鄉雞蛋卷,
影相時已經剩低個罐...
天氣咁潮濕, 正好俾個美麗嘅藉口我快D食晒佢!
的而且確係比一般超市能買到嘅蛋卷鬆化,
又唔係好甜,
我一次過可以食七條呢!



呢罐鮮牛油蛋卷呢,
故名思議多咗一陣牛油味.
其實除非食完一種味之後即刻食第二隻味啦,
唔係兩種味都差不多.
個人就喜歡家鄉味多D,
因為蛋味更濃郁.
比較吓食物標籤,
牛油蛋卷竟然比家鄉雞蛋卷更低卡!

兔寶寶都有份食架,
佢仲認得個罐,
一攞出來實唔會少得佢果份!

兔寶寶, 媽咪唔想俾你食架....
一來你同我爭食,
二來你食得超論盡呀,
你一路食我要一路抺地!

**********************

兔寶寶呢幾日胃口大開,
正餐食得好之餘仲食埋好多小吃,
呢日就自己食咗一球雪糕.
一面睇Barney一面嘆雪糕,
爽呀!