牛油西米焗布甸

2011年8月23日下午8:27

8月23日  星期二  炎熱


細個同呀媽去飲茶嘅時候, 最期待嘅唔係蝦餃燒賣, 而係飯後甜品時間.
唔係叫芒果布甸, 就係叫呢個西米焗布甸.
不過酒樓嘅西米焗布甸都有D我唔鍾意嘅蓮蓉响底,
同埋愈來愈少地方有得食,
所以就上網摷食譜, 自己整來食.

將約100克嘅西米放進滾水,
煮約5分鐘後, 熄火焗至透明.
倒去大部份水(又唔洗倒晒, 留返少少响煲)
加入糖(我用咗黃糖)及牛油(份量隨意, 我落咗少於20克, 怕肥 ),
攪至糖溶.

之後打散2隻蛋, 加入約大半杯鮮奶及兩大湯匙粟粉,
攪勻, 倒入西米糊內,
(要小心响蛋凝固前熄火)
雪櫃咁啱有忌廉就快過期,
於是又倒入少少忌廉.
攪勻就可以放入模子內,
用200度焗約20分鐘.

因為呢個係中式甜品, 所以我都無仔細去量份量,
總之唔太甜唔太油啱自己口味就OK了.
另外, 我起初用晒上下火,
到焗咗差不多15分鐘,
想佢面層有多少少燶,
就熄咗下火, 剩係用上火.

今日又去咗二德惠入貨,
本來係諗住放朱古力响底,
做朱古力西米焗布甸,
點知到入模時, 又無咗件事.

今次呢個布甸只係落咗好少糖,
唔係好甜,
所以一出爐就俾我食咗一大盆,
當飯咁食呀~~~